Duela egun batzuk Eudeleko egoitzan aurkeztutako kanpainaren helburua gazteei emakumeengana dagoen indarkeria detektatzen laguntzea eta prebenitzeko eta aurre egiteko baliabideak ematea da, udal iturriek aipatu dutenez. Izan ere, “burututako ikerketek erakusten dute indarkeri-jarrera batzuk hain ohizkoak direnez neskek eta mutilek tratu txarrak, batez ere psikologikoak, atzemateko zailtasunak izaten dituztela, Imanol Landa alkateak azaldutakoaren arabera. Bestalde, azaroko ohiko bilkuran, kanpainan parte hartzen duten erakundeen agiriarekin bat egiteko asmoa du Getxoko Udalbatzak. Indarkeria fisikoaz gain, "indarkeria sinbolikoa" ere kontuan hartu behar dugula gogoratzen du agiriak, "horren bidez, emakume izate hutsagatik egoera desberdinak bizi dituztela ohartzen direlako neska gazteak; adibidez, atzean pausu batzuk entzuteagatik espaloiz aldatzea, edo eremu publiko batetik alde egitea lotsatuta sentitu ondoren...".
Eraldatzen
Gogoratu, hirugarren urtez, Getxo I, Aixerrota eta Fadura institutoetako, Nuestra Señora de Europa ikastetxeko eta San Nikolas ikastolako DBHko hirugarren mailako 17 ikasgeletako ikasleak parte hartzen ari direla Getxoko Udalaren Berdintasuneko Zerbitzuak sustatutako "Eraldatzen" programan, emakumeenganako indarkeria saihesteko asmoz. Metodologia dinamiko eta parte hartzaile batean oinarriturik, sexu-genero, sozializazio prozesuak, maitasun ereduak eta indarkeria sexista bezalako gaiak lantzen ari dira ikasleak, ordubeteko iraupeneko bost saiotan. 2008-2009eko ikasturtean 327 neska-mutilek parte hartu zuten ekimenean.
Getxoko Udalak etxola bana jarri du Algortako Telletxe eta Areetako Xake plazetan, azaroaren 25eko Emakumeenganako Indarkeriaren Aurkako Nazioarteko Egunaren inguruan, Eudelek, Emakundek eta Eusko Jaurlaritzak antolatutako “Beldur barik” izeneko kanpainari zabalpena emateko asmoz. Horretarako, abesti eta bideoklip bat egiteaz gain, jarrera sexisten kontrako gida bat argitaratu dute. Bada, aipatu liburuxka eta "puntu lilaren" irudia banatuko dute etxoletan, asteazkenera bitartean. Azken hori, emakumeen aurkako indarkeria arbuiatzeko sinbolo bezala erabiltzea eskatu diete herritarrei erakundeek. Herritarrak artatzeko udalerriko bulegoek ere banatuko dute irudia eta, besteak beste, Getxoko udaletxeko kanpoaldean ere jarriko dute azaroaren 25ean. Azkenik, Gizatiarrek, Itzubaltzeta / Romo eta Areetako Emakumeen Gizarte eta Kultur Elkarteak, elkarretaratzea deitu du etzirako Bizkaiko Zubian, Areetan, 19:30ean. Argazkian, Areetako Xake plazan orain bi urte egindako elkarretaratzea / Urtzi Altube - Ilanda.eu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun