Uribe Kostako Mankomunitateko Euskara Zerbitzuak antolatuta, gaur arratsaldean abiatuko da Euskal Zinemaren Astea, “Eutsi!” filmaren proiekzioarekin, 18:00etan, Sopelako Kurtzio kultur etxean. Ekimenaren bitartez, euskal zinemagintzan diharduten zuzendarien lanak zein euskarara bikoiztutakoak, doan, eskaini nahi ditu tokiko erakundeak. Gauzak horrela, Kurtzioko aretoak beste bi emanaldi hartuko ditu: bihar, hilak 25, “San Adriango azeria” umeentzako pelikula, 18:00etan; eta 29an, igandea, “Zorion perfektua”, 18:30ean. Etzi, berriz, Armintzako kultur etxean egongo da ikusgai "Goazen" filma, 18:30ean. Ordu berean, baina ostiralean, hilak 27, hartuko du “Cristobal Molon” lanaren proiekzioa Urdulizko kultur etxeak. Azkenik, larunbatean, “Munduaren bira, doan” emango dute, 17:30ean, Gorlizko erakusketa aretoan. Bestalde, Euskararen Nazioarteko Eguna eta Gabonak ospatzeko antolatutako jardueren berri (pdf) eman du Euskara Zerbitzuak. Argazkian, "Eutsi!" filma egongo da ikusgai gaur Sopelako Kurtzio kultur etxean / cc Euskalkultura.com
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun