Barrikabasoren "kalifikazioa aldatzeko proposamena atzera botatzea" erabaki zuen, atzoko osoko bilkuran, Barrikako Udalbatzak; baita "indarrean dagoen araudiak zehazten duen kalifikazioaren arabera, eremua babestea" ere. Interes paisajistiko handiko tokia izanik, "babes bereziko gune" izendatua du Eusko Jaurlaritzak Barrikabaso; hortaz, ezin da lurrotan eraiki. Badirudi, beraz, inguruan 116 etxebizitza altxatzeko egitasmoa alde batera utzi duela EAJk, Txipio Bai elkarte naturalistak eskatu bezala. Dagoeneko, azaroaren 17ko ezohiko udal batzarrean, proiektu hori jasotzen zuen Hiri Antolamenduko Plan Orokorraren (HAPO) aurrerakina baztertzea erabaki zuen Udalbatzak. "Udalerriko kostalde osoa babesteko HAPOn jaso beharreko asmoa, gainontzeko hiri antolamendutako agirietan sartzea" ere jasotzen du EAJk atzo urgentziaz aurkeztutako proposamenak. Lau zinegotzi jelkideek eman zuten aldeko botoa eta udal batzarrera aurkeztutako EA, PSE-EE eta PPren ordezkari banak abstenitu egin zen. Dena den, EAJren Udal Gobernuak ez zuen ezertxo ere aipatu, Muriola eta San Telmon, Espainiako Auzitegi Gorenak "legez kanpokotzat" jotako 14 txaletak antolamendutik at izendatzeaz; Txipio Baik horiek botatzea ez eskatzeko "ezin utzizko" eskaeratzat hartu arren. Argazkian, Auzitegi Gorenak legez kanpo jotako txaletak / © Barrikako EA.
Txipio Bai elkarte naturistak egindako eskaera irailean aurkeztutako mozio banatan jaso zuten EAk eta PSE-EEk. Hala ere, atzora arte ez dituzte horiek aztertu, aurretik ohiko osoko bilkurarik egon ez delako. EAJk mozioak baztertzea eskatu zien oposizioko talde biei, "guztion artean proposamen bat adosteko". EAk eta PSE-EEk, baina, ezetza eman zioten jelkideek egindako eskaintzari. Bakoitzak bere mozioari eman zion aldeko botoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun