Txirrindulari profesional ezaguna izandakoa da, baina 2001eko otsailaren 15ean, auto gidari batek bera eta bere anaia zapaldu zituen Malagako errepide batean. Javierri garun-paralisia eragin zion, Ricardo anaia hil zen bitartean. Auto gidariak 1.800 euroko isuna besterik ez zuen ordaindu behar izan, epaiketaren ostean. Baina tragedian ito gabe, Javier Otxoak eutsi zion txirrindularitzari eta istriputik ahal den neurrian osatu zenetik hona hainbat sari irabazi ditu, Paralinpiar Jokoetan urrezko dominak tartean. Udalerriro Punta Galea txirrindularitza taldeak Javier Otxoa Klasika antolatzen du. San Inazio egunean, berriz, ospatzen den Getxoko Zirkuitua Ricardo Otxoa zenari dedikatzen diote.
Oraingo honetan, Otxoak berak onartu du, Grial auzia dela eta atxilotutako Walter Viru garai bateko Kelmeko medikua ezagutzen zuela. "Lau bider egon nintzen bere kontsultategian esfortzu probak egiten, beste profesional eta kirolzale asko bezala", aipatu zuenez. Hala ere, "ez nago atxilotuta dopin auzi honetan, eta ez naiz egongo", gaineratu zuen berangoztarrak. "As"-en arabera, Vicente Natividad Javier Otxoaren prestatzailea ere atxilotuta egongo litzateke. Berri agentzia batzuen arabera, txirrindulari paraolinpiarrak epaileen aurrean deklaratu zuen atzo.
"As" kirol kazetari bidalitako ohar batean (espainolez) argitu zuen atzo Javier Otxoa txirrindulari paraolinpiar berangoztarrak Grial auziarekin zerikusirik ez daukala. Besteak beste, aipatu kirol kazetak zabaldu zuen (espainolez) herenegun iluntzean Guardia Zibilak dozena bat lagun atxilotu zituela, dopin auzi batekin zerikusia zeukatelakoan, eta Otxoaren beraren etxea miatu zutela. "Ez naiz egon epaitegian, eta ez dute miatu nire etxerik", adierazi zuen berangoztarrak. Halaber, komunikabideei zuzendu zitzaien kirolariak. "Horrelako albisteak emateko orduan, zehatzagoak eta egiatiagoak izatea eskatu nahi diet kazetari zein medioei. Honek nire buruari zein familiari egiten dion kaltea neurtezina da eta dagoeneko nahikoa sufritu dut bizitza honetan", aipatu zuen Otxoak. Argazkian, Javier Otxoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun