Egun, Banco Sabadell da Quiron Bizkaia ospitalearen jabea, Quiron Taldeari 55,1 milioi euro ordaindu ostean. Hala ere, aipatu ospitale taldea arduratuko da zentroa kudeatzeaz, gutxienez, 20 urtez.
Quiron ospitale taldeak (espainolez) Ibaizabalen eskuin ibarrean jarri duen zentro berriak 2010eko urtarrilean zabalduko ditu ateak, gaur goizeko inaugurazio ekitaldian jakinarazi dutenez. Quiron Bizkaia ospitaleak (espainolez) 20.500 metro koadroko azalera hartzen du, EHUko campusetik gertu, bost solairuko bi eraikin nagusitan banatuta. Orotara, 80 milioi euro inbertitu dituzte ospitale orokorren zerbitzu guztiak eskainiko dituen azpiegitura berrian, eta 110 gaixorentzako lekua eskainiko du. Quiron Taldearen esanetan, "ospitale berriak diagnostiko, tratamendu eta telemedikuntzako tresnarik aurreratuenak izango ditu, eta Euskal Herriko zaintza pribatuaren buruan jarriko da". Horretarako, bakarrik, 15 milioi euro jarri omen dituzte. Gauzak horrela, 200 profesionalek baino gehiagok lan egingo dute. Guztira, 350 lanpostu berri sortu ditu Quiron Bizkaia ospitaleak, arduradunen arabera. Rafael Bengoa Eusko Jaurlaritzako Osasun sailburuak, Joseba Goikouria Erandioko alkateak, Pilar Muro Quiron Taldeko presidenteak eta Armando Cortezon osasun zentro berriko zuzendariak parte hartu dute, gaurko inaugurazio ekitaldian, beste 550 gonbidatu ingururekin batera. Argazkian, Bengoa eta Muro gaurko ekitaldian / © Quiron.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun