Historian zehar inperioen ohiko jardunbidea izan da herri "urduriei" bahituak berme moduan eskatzea. Armadek lurralde "ez-normalizatuak" igarotzen zituztenean, atzeko aldean jartzen zituzten bahituak, soldadu gehienak igarotzea ziurtatzeko. Altabizkarreko ihintzak dio sekula ez zela kasualitatea izan, 778ko abuztuan, frankoen armadaren atzealdeari eraso egin izana. Sekula ez baitio herri batek beste bati 34 gazte eramaten utzi. Batak bestearen etorkizunaren jabetza sinbolizatzeaz gain, lehen ez zegoelako lo egiteko pilularik. Eta lorik egiten ez duena, hil egiten da.
Pozoituta dago egunero ahulago eta berriz jaiotzear den eguzki zahar hau. Odol hotzaren sasoia da, azaroa, hazia ereiteko aroa, ernatze guztietan legez, iluntasun aroa. Lehenengo aldiz urteetan, jendea hazia ereiten ikusten dut. Batzuek Altsasun, besteek Ean, hangoak isilik, hemengoak erne... Baina nik Esperantzaren Frontoian –Oteiza beti gurekin– entzun nituen hitzetan sinetsi nahi dut: "lehenengo entzungor egiten dizute, gero barre egiten dizute, ondoren eraso egiten dizute eta orduan irabazten duzu".
Mila udaberri negutu zaizkigu herri honetan, beraiekin energia izugarria zurrupatu digutenak. Historiaren gai-jartzaileak gure izena esan du; galdu ala irabazi, guztia jokatzeko unea da.
Fredi Paya bertsolari algortarrak gaur "Berria" egunkarian argitaratutako artikulua.
[© Fredi Paya - Berria.info] Minotauroak ordainsari berria eskatu du. Homerren, euskal-amerikar Homeroren garaietan bizi gara. Eta orduan bezala, eskuak lotzen dizkiete atzerritarrek bahituei labirintora eroateko. Madarikatua bere gazteak babesteko gai ez den herria, ez baitu etorkizunik merezi. Haserre begiratzen dio elurretako damak bere herriari Anbotoko leizetik. Ez bera ahaztu dugulako, bere seme-alabak saltzen ditugulako baizik. Ez digu Minotauroa hilko duen Pertseorik bidaliko. Greziar zaharrek ez bezala, laster kondenatuko genuke, eta bizkarretik akabatuko. Badaki gutaz horrenbeste. Argazkia: cc-by Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun