Bitartean, Aiboako metro geltokiraino hurbildu da Jose Luis Bilbao Bizkaiko ahaldun nagusia, "erasoaren ondorioak lehen eskutik ezagutzeko". Berak ere gpgor gaitzetsi ditu Algorta eta Markinako gertaerak. Bilbaoren arabera, "gizarteak Metro Bilbao eta Bizkaibus zaindu eta balioesten duen bitartean, gutxi batzuek, bolbora eta gasolinaren 'aberriaren salbatzaile' hauek inguruan daukaten guztia suntsitzen aritzen dira". "Markinan autobusa erre zein Aiboako metro geltokia txikitu duten horiei gutxi axola zaizkie guztien ongia, jendearen beharrak edota elkarbizitza. Gure mespretxua, gaitzespena eta Legearen ezarpena baino ez dute merezi", gaineratu du Bizkaiko ahaldun nagusiak.
Anton Danborenea Bizkaiko PPko presidenteak ere prentsa oharra zabaldu du, erasoak gaitzesteko. "Indarkeria zaleak erasotzen eta suntsitzen ibiltzen diren artean, beste behin ere, ekintzok gaitzestea eta Justiziak haien aurka egin dezala itxarotea baino ez zaigu geratzen demokratei, ahalik eta lasterren kartzelan amaitu daitezen", adierazi du Danboreneak. Gauzak horrela, "segurtasun kamerek gaizkileak grabatu izana" espero du Bizkaiko popularren buruak, "identifika eta atxilo ditzaten laster". Halaber, "atxilotzen dituztenean, kalteak euren poltsikotik edo, adin txikiak badira, haien gurasoek" ordain ditzatela eskatu du Danboreneak.
Aiboako metro geltokiaren kontrako erasoa gogor gaitzetsi du Getxoko alkateak
Gaur goizaldean Aiboako metro geltokiaren kontra burututako erasoa gogor gaitzetsi du Imanol Landa Getxoko alkateak, eta "erabateko arbuioa" agertu dio. Udal agintariak adierazi duenez, “herritarrek lanera joateko erabiltzen duten garraiobidea boikotatzea 'eraikuntza nazionala' ulertzeko batzuek duten era bitxia omen da”. Landaren hitzetan, “herritarrok krisi garai zail eta gogor honetan gure egunerokoarekin nahiko dugu, lau 'argiegin' horiek etorri eta metroa, gure auzokideok lanera joateko gehien erabiltzen duten garraiobidea boikotatzeko”. Alkateari "berdin" zaio, "intolerantzia, basakeria eta faxismoaren muturreko adierazpena diren mota horretako erasoak justifikatzeko, jende horrek esan dezakeena". Argazkian, Aiboako metro geltokia zabaltzeko beharrean ari dira langileak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun