Espainiako Vuelta Getxora ekartzeko mozioa onartu dute

PSE-EEko zinegotzien laguntzaz mozioa "gehien osoz" onartu ostean, agudo iragarri du PPren prentsa bulegoak "Getxo 2011ko Espainiako Txirrindularitza Vuelta bertan hasi edo amaitzea eskatuko duen lehenengo udalerria" izango dela. EAJk eta Ezker Batuko Manuel Basanta zinegotzi berriak, aldiz, aurka bozkatu dute. "Batzuetan busti beharra dago, bainua freskagarria izango dela badakigulako", Jesus Toca Getxoko PPko ordezkariak adierazi duenez. Popularren arabera, "dirua suposatuko duen arren, turismoa, ostalaritza eta merkataritza sustatzeko balioko du"; baita "Getxo nazioarte mailan ezagutzera emateko" ere. Gauzak horrela, Javier Guillen Espainiako Txirrindularitza Vueltako zuzendari nagusiak Europa Press-i adierazi dionez (espainolez), Getxoko Udalbatzaren adierazpena "oso albiste positiboa da, Vuelta maite duten lekuetara heltzen baita soilik". Hala ere, horrek ez du esan nahi gaurko osoko bilkurako erabakia gauzatuko denik. Izan ere, EAJk buru duen Udal Gobernuak beti defendatu du udal batzarretan onartutako mozioak ez direla "bete beharrekoak". Argazkian, uztailaren 31n, San Inazio egunean jokatu ohi den Getxoko Zirkuitua jarri du udalerrian dagoen bizikleta zaletasunaren "eredu" Getxoko PPk.