Pariseko Apelazio Auzitegiak Aitor Artetxe algortarra, Itziar Plaza bilbotarra eta Andoni Sarasola lesakarra Espainiara eramatea erabaki du, Auzitegi Nazionalean epaitzeko, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Hala ere, Frantzian erakunde armatuko kideak izateagatik zabalik dituzten sumarioak burutu arte ez dituzte Espainiara eroango. "Aitorren kasuan, Espainiako Auzitegi Nazionaleko Pedraz epaileak emandako euro-aginduari erantzuten dio Frantziako Auzitegiak. 2008ko maiatzaren 19an Areetako Abrako Errege Itsas Klubaren aurkako erasoan parte hartzea leporatzen diote. Horretarako, atxilotuek Espainiako poliziaren etxean egindako deklarazioetan oinarritzen dira, hau da, inkomunikazioan eta torturapean sinarazitako deklarazioetan", azaldu errepresioaren kontrako erakundeak. Artetxe Frantzian preso dago abenduaren 8an atxilotu zutenetik. Argazkian, Artetxe eta Uribe Kostako beste bost lagun atxilotu zituzteneko mobilizazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun