PSOEren ezinaren adierazle dugu errepresioaren erabilpen itsuaren mozkorraldi hau. Muga eta araurik ez duen estrategia errepresiboa jarri dute abian, adibideak zenbatu ezinak direlarik: legez kanporatzearen estrategia muturrera eramanez, Ion Anzaren desagerpena, presoen aurkako erasoak, gazte ezberdinen bahiketak, sarekadak...
Errepresio guzti honen erdigunean gazteria, gazteria antolatua eta borrokalaria. Askapen borrokaren oxigenoa eta beronen etorkizunaren berme izanik, behin eta berriro kolpatua. Eten gabe kolpatua, baina etengabe jaikia. Lehenengo Jarrai eta Haika, gero Segi, eta orain zer legaz kanporatu ez dutenean tamaina honetako operazioak egin behar geldiezina den mugimendu batekin bukatzen saiatzeko.
Azken polizia operazio honen atzetik, pozik eta irribarretsu agertu zaizkigu eskuak odolez zikindurik dituzten PSOEren agintariak, GALen oinordekoak. Rubalcaba, Ares edota Lopez jauna harro azaldu dira, operazio honen bitartez Segiren zuzendaritza desegin dutela aipatuz. Baina... ez al zarete konturatu dagoeneko Segi Euskal Herriaren luze zabalean barreiatuta eta txertatuta dagoen errealitate bat dela? Ez al zarete konturatu gure zuzendaritza gazteria bera dela eta operazioak operazio gazteriak herriz herri independentzia eta sozialismoaren alde antolatzen eta borrokatzen jarraituko duela? Gauzak argi ditugu. Orain dela 30 urte sortu ginenetik hona gure apustua herri honen independentzia erdietsi eta eredu sozialistan oinarrituriko herria eraikitzea izan da.
Ondorioz, herriz herri eta auzoz auzo, gazte mugimendu iraultzaile eta oro har gazteriarekin batera, askapen borrokak behar izan dituen pausuak ematen joan gara.
Orain, gainera, askapen borroka fase berri batean sartua delarik, ezinbestekoa ikusten dugu gazteriaren ekarpena. Alde batetik, gure herri eta auzoetan independentista sentitzen garen gazteok batu eta geure ibilbidea egiten has gaitezen. Baina horrekin batera, gazte mugimendu iraultzailean parte hartuz, gazte asanbladetan lan eginez, herri aldizkarietan, bestelako jai ereduen alde, ikastetxeetan edota behar den leku guztietan independentzia egunez egun eraikitzeko konpromisoa hartzen dugu.
Beste ezeren aurretik, gure besarkadarik beroena heldu arazi nahi diegu momentu honetan atxilotuak izan eta indar polizial faxisten eskuetan inkomunikaturik eta tortura arriskuan dauden 34 kideei. Testuinguru berezian etorri zaigu gure aurkako azken operazio politiko-poliziala. Begi bistakoa da Euskal Herrian bestelako eszenatoki berri bat eraiki ahal izateko fase berria oztopatzea beste helbururik ez duela eraso berri honek. Urteetan zehar ezker abertzaleak zein herri sektoreek garaturiko borrokaren ondotik, Euskal Herria bide gurutzera ekartzea lortu dugu. Duela 30 urte, herri hau zatitu eta finean desager araztea beste asmorik ez zuen makinaria politiko eta instituzionala gainditzea lortu da. Ondorioz, Euskal Herriak parez pare dauzka irekita ateak fase politiko berri baten baitan independentzia posible egin dezakeen aldaketa gauzatzeko. Ondo baino hobeto irakurri dute egoera hau estatu biek, bereziki estatu espainiarrak eta gobernuan dagoen PSOEk. Herri hau behin betikoz bere kabuz ibiltzen hasi eta askatasuneraino iritsiko den beldurrez, motzetik eta behar diren bide guztiak erabiliz, mugimendu independentista deus-ezteko estrategia politiko eta militarra garatzen dihardute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun