Galder Bilbao “Txapi” 2003ko urriaren 8an atxilotu zuten Getxon. Egun horretan, 34 pertsona atxilotu zituzten (Berria.info), 29 Garzonen aginduz eta bost Le Verten aginduz. Espainiako Poliziak esan zuen atxilotutakoak ETAren "kaptazio aparatuaren" kideak zirela, AAMk azaldu duenez. Hurrengo egunetan haietako hainbat libre geldituko ziren (Berria.info). Atxilotutakoek tratu txarrak jaso zituztela salatu zuten. Epaituko dituzten beste batzuk, aldiz, 2003ko azaroaren 18an atxilotu zituzten. Egun horretan, 13 herritar atxilotu zituzten (Berria.info), beste sarekada “prebentibo” batean. Orotara, 2003 eta 2005 artean, 131 herritar atxilotu zituzten "kaptazio aparatukoak" zirelakoan, Ibon Fernandez Iradi "Susper"-ri ustez aurkitutako paperetan oinarrituta.
Txapi 2006ko ekainaren 26an kaleratu zen, 30.000 euroko fidantza ordainduta. Algortarrarekin batera sarekada berean atxilotutakoak ere kaleratu ziren: Regina Maiztegi, Karlos Martin, Zugaitz Izagirre, Maider Egiguren, Goizeder Anton, Ikerne Indakoetxea, Garikoitz Mendioroz, Ramon Lopez, Jugatx Duñabeitia, Iker Casanova, Arantza Martin eta Jabier Gil.
Beste epaiketa bat
Beste alde batetik, Galder Bilbaok beste epaiketa bat eduki zuen 2004ko ekainean. Getxoko PPko zinegotzi Marisa Arrueri 1999an bidali zizkioten "Euskal Presoak Euskal Herrira" lemako postaletako bat berak bidali zuela leporatu zioten. "Poliziak esan zuen bere hatz marka topatu zutela gutun-azalean. Txapik ukatu zuen berak karta hori bidali zuenik. Gainera idatzitako testuaren kaligrafia ez zen berea. Izan ere, karta horiek kanpaina baten barruan bidali ziren, eta kalean egon ziren jarrita mahaietan, jendeak bidaltzeko", azaldu du Uribe Kostako Amnistiaren Aldeko Mugimenduak. Bi urteko espetxe zigorra sartu zioten. Algortako beste gazte bat ere zigortu egin dute akusazio horregatik. 2005eko maiatzean, berriz, Auzitegi Gorenak absolbitu egin zuen Txapi “delitu” honetaz, epaitu zutenerako preskribituta zegoelako argudioarekin.
Abenduaren 9an hasiko da 13 euskal herritarren kontrako epaiketa Espainiako Auzitegi Nazionalean. Horien artean, Galder Bilbao "Txapi" dago auziperatuta, Uribe Kostako Amnistiaren Aldeko Mugimenduak Etengabe bitakoraren bitartez baieztatu duenez. 2003an atxilotu zituzten guztiak, sarekada “prebentiboetan”, poliziaren arabera, "Frantzian atxilotutako ETAko kide batek enkriptatuta zeukan zerrenda batean beraien ezizen edo gaitzizenak agertzen zirelako". "Horixe da beraien kontrako akusaziorako elementu bakarra. Poliziaren arabera pertsona horiek etorkizunean ETAn sartuko liratekeen", salatu du errepresioaren kontrako erakundeak. Epaiketa abenduaren 9, 14, 15, 16 eta 17rako deituta dago, goizeko 10etan, Auzitegi Nazionaleko 3. atalean. Fiskalak 10 urteko espetxe zigorra eskatzen du lau lagunentzat, ETAko kideak direla egotzita, eta 7 urteko espetxe zigorra gainerakoentzat, ETAri laguntza ematea leporatuta. Terrorismoaren Biktimen Elkarteak (AVT) 10 urteko espetxe zigorra eskatzen du guztientzat, ETAko kideak direlakoan, edo 7 urte, "subsidiarioki", ETAri laguntza emateagatik. Argazkian, Galder Bilbao "Txapi", 2006ko ekainaren 26an, kalera irten zenean / publicdomain Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun