Arratsaldez ere ez da animaziorik faltako. 19:30ean hasiko dira ekitaldiak: musika eta dantza emanaldiak izango dira. Besteak beste, Julio Ibarrak egingo du ekitaldiaren aurkezpena eta Barinatxe taldeak txistu kontzertua emango du. Ondoren, piano doinuak eta ahotsa uztartuko dituzte Maite Aranguren piano joleak zein Garbiñe Abendaño eta Maite Ojanguren sopranoek. Ander Blascok, bere aldetik, eskusoinuaz alaituko du emanaldia. Musika ikuskizunen ostean, Ikerne Goikoetxeraen emanaldiaren txanda izango da. Ondoren, Sopelana Bibolin hirukoteak joko du. Alurr dantza taldeak bere ikuskizuna taularatuko du biolin hirukoaren gibeletik. Musika emanaldi, ikuskizun eta dantzaldi horiek guztien ostean emango zaio amaiera ekitaldiari.
Zerbitzu ugari bertan
Kurtzio kultur etxeak ekimen ugari hartu eta hainbat programa jarriko ditu abian, udal iturriek adierazi dutenez. Besteak beste, Kzgunea, Gazte Informazio Bulegoa, eta Kultura zein Kirol sailak bertan dira lanean, egun. Margogintza aretoa eta erabilera anitzetarako gelak ere martxan dira dagoeneko. Areto nagusian ere zenbait ekintza, aurkezpen eta prentsaurreko egin dira orain arte. Hemendik aurrera, dantza, musika, antzerkia eta abar luzeaz gozatzeko aukera emango du areto horrek. Bestalde, Kurtzio kultur etxeak herritarrei zuzendutako ekipamendu zabala du, hala nola, Txikigunea (2 eta 4 urte arteko haurrentzat), Ludoteka (4 eta 12 urte bitartekoentzat) eta Gaztelekua (13 eta 18 urte bitarteko gazte eta nerabeentzat).
Kurtzio kultur etxea (Mendieta, 11) ofizialki inauguratu dute gaur eguerdian Sopelan. Ekitaldian parte hartu dute Imanol Garai udal agintari sopeloztarrak eta Josune Ariztondo Bizkaiko Foru Aldundiko Kultura ahaldunak. Halaber, inaugurazioan izan dira Imanol Landa, Juan Jose Ezpeleta, Juan Olea eta Pedro Botejara; Getxo, Barrika, Urduliz eta Lemoiz udalerrietako alkateak, hurrenez hurren. Imanol Garaik kultur areto berriaren izenaren jatorria izan du hizpide: “Kurtzio du izena bertan gurutze bide bat zegoelako. Hain zuzen, hori adierazten du euskaraz ‘kurtzio’ hitzak. Inguru oso hau izen horrekin ezagutzen da”, aipatu duenez. Bere aldetik, Josune Ariztondok azpimarratu duenez, “zalantzarik gabe, kultur etxe honen bidez, jauzi garrantzitsua eman da ekitaldi desberdinak hartzeko ekipamenduan. 30 urte daramatzat herrian bizitzen eta asko aldatu da epe horretan. Sopela, atzera begira gelditu gabe aurrera begira jarri da, Kurtzio kultur etxea horren adibide garbia da. Kultura herrian finkatzen lagunduko duen espazioa izango da”. Argazkian, ohorezko aurreskua gaurko ekitaldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun