Bizkaiko Foru Aldundiak Giza Art deritzon argazki-erakusketa jarriko du abian bihar, asteartea, Mungian. Martxoaren 30era bitartean, sei herritan zehar ibiliko da ekimena: Leioak martxoaren 4tik 13ra hartuko du. Erakusketa Hibai Agorria argazkilari profesionalaren 20 irudik osatzen dute, eta bere helburua da "bizkaitar guztiak ohartaraztea emigrazioaren fenomenoaz", foru iturriek adierazi dutenez. Horrez gainera, “Emakumeek ekonomiari egindako ekarpena” izenburua duen ekimenak emakume etorkinek diharduten lan-eremuak nabarmendu nahi ditu: "alde batetik, salatu nahi du beti lan berdinetan sailkatzen dituztela; eta bestetik, agerian jarri nahi du zaintza-lanez eta etxeko lanez gain jarduten dutela beste lan-eremu batzuetan ere", azaldu dute antolatzaileek. Hori dela eta, erakusketak bi alde ezberdin ditu: produkzioaren arloa eta erreprodukzioarena. Argazkian, Giza Art erakusketaren argazkietako bat / © Bizkaia.net.
Proiektua Mujeres en la Diversidad elkartearen ideia izan da, eta iaz abiatu zen esperientzia pilotu batekin: emakumeek eurek atera zituzten argazkiak. Aurten, berriz, Hibai Agorria argazkilari profesionalaren eskua eduki nahi izan dute lanerako. Autore horrek hasiera-hasieratik esku hartu zuen, inguru egokienak diseinatu eta zaintzen, emakumeek gizarteari egiten dioten ekarpena adierazteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun