Euskal preso politikoen eskubideen aldeko manifestua:
Une honetan espainiar nahiz frantziar espetxeetan euskal preso politikoek bizi duten egoeraren aurrean benetako kezka agertu nahi dugu:
- Gaixotasun larriak dituzten euskal preso politikoak espetxean mantentzen dituzte. Minbizia edo gaixotasun psikologiko larriak dituzten presoak espetxean mantentzea oinarrizko giza eskubideen aurkako neurria da zalantzarik gabe.
- Zigorra betea duten euskal preso politikoak espetxean mantentzen dituzte. 20 urteko espetxe zigorra osorik bete duen preso bati bere zigorra beste hamar urtez luzatzeak praktikan biziarteko espetxe zigorraren aplikazioarekin parekatu daiteke.
- Euskal preso politikoen %99 beraien etxetik ehunaka kilometrotara sakabanatuak daude. Sakabanaketa politikak presoak urruntzea eta isolatzea dakar. Honez gain, azken 20 urteotan sakabanaketa politikak hamabost hilero senide bat hil du.
- Euskal preso politikoek ikasteko eskubidea urratuta dute. Espainiar espetxeetan dauden euskal presoek debekatuta daukate EHU-UPVn ikastea, ikasketak UNEDen bidez eta gaztelaniaz burutzera behartzen dituztelarik. Frantziar kartzeletan dauden euskal preso politikoen kasuan, orain arte EHU-UPVn ikasteko aukera bazuten, ikasturte honetan ezinezkoa izango zaie ikasketekin jarraitzea.
Gaixotasun larriak dituzten eta zigorra bete duten presoen kaleratzea aldarrikatzen dugu. Ikasteko eskubidearen eta dagozkien beste eskubide guztien jabe euskal presoak Euskal Herrira hurbiltzea aldarrikatzen dugu.
Azken hilabeteotan elkartasuna bera ere jazarria eta zigortua izaten ari dela ikusi dugu. Sorgin ehiza honekin amaitu eta euskal preso politikoekiko elkartasuna eta babesa erabat zilegi direla esan nahi dugu.
Aldarrikapen hauek indartzera goaz datozen hilabeteotan. Gure aldetik, garrantzia berezia eman nahi diogu abenduaren 16an Leioako campusean burutuko diren prentsaurreko eta manifestazioan zein urtarrilaren 2an Bilbon ospatuko den manifestazio nazionalean parte hartzeari.
Abenduak 16, asteazkena
11:30ean, Leioako campuseko Gizarte Zientzien fakultatean,
Prentsaurreko Masiboa eta Manifestazioa.
Urtarrilak 2, larunbata
17:30ean,
Manifestazio Nazionala.
Ikasteko eskubidearen jabe, euskal presoak Euskal Herrira!
Abenduaren 16an euskal preso politikoen eskubideen aldeko manifestazioa egingo dute Leioako campusean
Egunotan, preso politikoen eskubideen aldeko atxikimendu bilketa egiten ari dira Euskal Herriko campus eta fakultate desberdinetan, bereziki "presoen ikasteko eskubidea berma dadin" eskatuz. "Momentu honetan euskal preso politikoek bizi duten egoera ankerraren adibideetako bat ikasteko eskubidearen ukapena da", Presoen Aldeko Taldeek (PAT) adierazi dutenez. Gauzak horrela, manifestura atxikitutako unibertsitate-eremuko ikasle, irakasle, langile eta eragileen artean prentsaurreko "masiboa" egingo dute abenduaren 16an, asteazkena, Leioa eta Erandioko campusean. Gizarte Zientzien fakultatean jarri dute hitzordua, goizeko 11:30ean. Horren ostean, euskal preso politikoen eskubideen aldeko manifestazioa egingo dute campusean zehar. Atxikimenduak fakultate zein ikastegi desberdinetan jarriko diren mahai desberdinen bidez jasoko dira, PATek argitu duenez. E-posta bidez ere eman daiteke atxikimendua pat[abildua]pat-eh.org helbidera mezu bat bidaliz, izen-abizenak eta lanbidea adieraziz. Halaber, urtarrilaren 2rako Etxerat elkarteak deitutako nazio manifestazioarekin ere bat egin dute. Bilboko Aita Donostia plazatik abiatuko da, 17:30ean. Argazkian, Leioako campusean sinadurak batzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun