Metroaren ordez autobusa erabili beharko da asteburu luzean Algorta eta Larrabasterra artean
Bizkaiko Garraio Partzuergoa (BGP) aurrera darrai Getxo aldeko Maidagan kaleko trenbide-pasagunea kentzeko lanekin. Asteburu luze honetan, gurutze-trabes berria (trenbide-gurutze bikoitza) jarriko dute Bidezabalgo geltokiaren ondoan. Abenduaren 5etik 8ra, Algorta eta Larrabasterrako geralekuen artean zerbitzua etetea ekarriko dute lanek, Metro Bilbao garraio enpresak jakinarazi duenez. Trenen ordez autobusak jarriko dituzte, ordutegi eta maiztasun berberekin (pdf). "Aurrekoetan bezala, bezeroei ahalik eta endredorik gutxien eragingo zaielakoan hautatu dira egun horiek, jai-zubi hori urteko bidaiaririk gutxien ibiltzen den sasoietako bat denez gero", aipatu dutenez. Argazkian, 2008ko bukaeran Metro Bilbaok bulegoa paratu zuen Algortako Bidezabalgo plazan, bertan herritarrei Maidagango pasonibelako lanei eta Getxon egitekoa den geltoki berriari buruzko informazioa emateko.
Metro Bilbaok autobus zerbitzu berezia jarriko du trenen ordez, egun eta gaueko ordutegi berberekin. Bezeroek tren-autobus aldaketa egin beharko dute errepideko garraioa Algorta, Bidezabal, Berango eta Larrabasterrako metro geltokien ondoan hartuta. Halere, Bidezabaletik Algortarantz joateko, Sarrikobaso kalean hartu beharko da autobusa. Obrei dagokionez, zehazki, Bidezabalgo geltokiaren ondoan trenbide-gurutzaketa bikoitza ipiniko da, etorkizunean 1. lineako puntu horretan amaituko diren trenek maniobra ezberdinak egin ditzaten. "Azpiegitura hori beharrezkoa da 2010eko Aste Santutik aurrera Maidaganeko barrera-pasabidea lurperatzeko obrekin hasiko badira", Metro Bilbaoko iturriek aipatu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun