Maria Jesus Aranburu sailburua izan da ordezkari gisa, eta adierazi duenez, euskara eta euskal kulturan “erreferente garrantzitsua den azokari babesa” eman nahi izan diote beste behin ere. Iaztik garbi zuten beren apustua hau izango zela edizio honi begira. EITB, GoiTB eta Hamaika TB-ren kazetaritza lanek osatuko dute egunez eguneko egitaraua eta, beraz, egunotan bete betean murgilduko dira zirrikitu guztiak ondo jaso eta zabaldu asmoz. Jon Irazabal azokako zuzendariak ere hartu du hitza eta giltza, izan ere, bera izan da sarrera nagusia irekitzeko ohorea izan duena.
Bertsoa break-a eta hip hop-a elkarturik
Elkartegian elkartu dira hiru arte modu hauek Aritz Sound Systemen gidaritzapean. Ehun bat lagunentzat prestatutako aretoa txiki geratu da eta askok eta askok, zutik ikusi behar izan dute ekitaldia.
Iñaki Viñaspre bertsolari arabarrak kantatu du agurra eta jarraian, Djefek ireki du bidea. Hip hopa zuzenean entzun ahal izan dute gaztetxoek. Barakaldo aldetik Maisha eta Raiko, eta Endika, Rufo eta beste hainbeste gazte aritu dira aretoa berotzen. Eta nola ez, Xabier Silveira eta Iñaki Viñasprek eman diote bertso-raparen ikutua. Bertsoaz gain, euskarazko hip hopa, break dantzariak eta beat boxaren nahasketek osatu dute erakustaldia.
Goizeko 10:20an dena prest zegoen irekierarako. Urduritasuna nabaria izan da azokara inguratutakoen artean. Ate nagusian zain zeuden ehundik gora ikasle, gazte eta lagun. Landako aretoaren erdigunean kokatu dute telebista pantaila handia, eta azoka zabalik den bitartean, atsedenik gabe izango dira hainbat telebisten lanarekin osatutako bideo, erreportaje eta elkarrizketak. Gipuzkoako Foru Aldundiko Euskara eta Kultura Sailak lagunduta, aurtengo edizioak ikus-entzunezkoen presentzia nabariagoa izango du. Eskaintza ere ez da faltan izango: asteartera bitartean, Euskal Liburu eta Disko Azokaz gain, Euskal Dendaren 14. edizioa eta Sapuetxe gaztetxeak antolatutako Azoka Ez Komertziala izango baitu aukeran erosleak. Horrekin batera, Elkartasun Denda izango da aurten ere Durangoko azokan; Montebideo kaleko 1. zenbakian, hain zuzen ere. Argazkian, Jon Irazabal azokako zuzendariak hartu du hitza ekitaldian / © Txelu Angoitia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun