Gaur hasita eta igandera arte, 60 artista gaztek erakutsiko dituzte euren lanak Getxoarte 2009 erakusketan. Ekimen horren helburu nagusia Euskal Herriko arte plastiko eta ikus-entzunezko sorkuntza berria bultzatze da, Getxoko Kultur Etxeko iturriek zehaztu dutenez. Ohi bezala, erakusketa Areetako Xake plazako karpan kokatuko da. Bertan, bisitariek hainbat motatako lanak izango dituzte ikusgai: pinturak, argazkiak, marrazkiak, grabatuak eta ikus-entzunezkoak, besteak beste. Aretoaren ordutegia honako hau da: goizez, 11:00etatik 14:00etara; eta arratsaldez, 17:00etatik 21:30era. Orain dela zortzi urte sortu zen Getxoarte, Arte Sortu Berrien Aretoa, arte proposamenik gazteenak erakusleiho bilakatzeko eta, era berean sortzaile berriek euren lana ezagutzera emateko asmoz. Gainera, artista gazteek esperientzia praktikoa dute Getxoarte eta bere lanetan interesa duten pertsonekin zuzeneko harremana izan dezaten, bai publikoko jendearekin, bai sektoreko profesionalekin. Horrela, modu natural eta profesionalean, parte hartzaileek, inolako oztoporik gabe, beren lanak gustuko duten ikusleekin hitz egin dezakete zuzenean. Argazkian, hainbat ume iazko Getxoarten.
Lau egunez, orain arte anonimo izan diren, baina etorkizun oparoa duten artisten lanen erakustoki erraldoia izango da Xake plaza. Erakusketak oso genero ezberdinak hartzen ditu: pintura, eskultura, argazkia, bideoa, marrazkia eta grabatuaz gain eta erlaziozko-estetika lanak, izango dira ikusgai. Horrela, ekitaldi honetara datozen bisitariek ikuspegi oparoa izango dute begien aurrean. Getxoarten aukera artistiko guztiak sartzen dira, proiekturik pertsonalenetatik hasita eta taldeko proiektuetaraino. Gainera, euskal arte produkzio garaikidearen orainaren eta etorkizunaren irudi bizia da. Aurtengo partaide gehienek EHUko Arte Ederren Fakultatean ikasten dute. Getxoartek lankidetza estua dauka fakultate horrekin hain zuzen ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun