Gaur goizaldean gertatutakoa kale indarkeria ekintza dela iradoki du Leioako alkateak
Lehen datuen arabera, Ertzaintzak ez du uste goizaldean Leioan gertatutakoa kale indarkeria ekintza bat izan denik. Ezezagunek 18 edukiontzi erre dituzte eta kalean aparkatutako zortzi ibilgailuk ere kalte handiak izan dituzte, sutearen ondorioz. Hala ere, agudo atera dira Espainia aldeko hainbat hedabide, suari egur gehiago botaz. Besteak beste, Libertad Digital agerkariak ondoko titularra jarri dio albisteari: "Kale terroristek 18 zarama edukiontziri su eman diete Bizkaian" (esan gabe doa hau itzulpena besterik ez dela). Momentuz, PSE-EEko Rodolfo Aresen neska-mutilek kontrakoa esan arren, Eneko Arruebarrena Leioako alkate jelkideak ere iradoki du kale eraso baten aurrean egon gaitezkeela. Prentsara bidalitako gaitzespen oharrean aipatu duenez, "kiskalita, zikin, pobretuta eta minduta dago Leioa. Ekintza nazkagarri onek ez dio askatasun, justizia edo bake handiagorik ekarri gure udalerriari, ezta hemen bizi garenoi". Egileei dagokionez, "gizartean elkar bizitzearen zentzurik oinarrizkoena" ere ezagutzen ez dutela, adierazi du Arruebarrenak. Alkatearen hitzetan, "horretarako eskubide osoa izanda, ezberdin izan, sentitu eta pentsatzen duen hori errespetatzea, alegia". Bihartik aurrera kaltetuen erregistroa osatuko du Leioako Udalak. Argazkian, Eneko Arruebarrena alkate leioaztarra prentsaurreko bat ematen.
Eneko Arruebarrena alkateak "irmoki" gaitzetsi ditu udal korporazioaren eta "leioaztarren gehiengoaren izenean", gaur goizaldeko "basakeria". "Leioaztar komunitateak bizi eta lan egiten duen bake eta lasaitasun giroaren kontrako zuzeneko erasoa izan da ondare publiko zein pribatuen aurkako atentatu hori", adierazi duenez. Erasoaren ezaugarriez ere aritu da Arruebarrena: "aurretik pentsatu, kalkulatu eta koordinatuta egin dute. Nabari da, gainera, aukeratutako tokiak zuzen-zuzenean ezagutzen zituztela", aipatu duenez. Eusko Jaurlaritzaren Herrizaingo Sailaren arabera, ordu biak eta 2:30ak artean su eman diete edukiontzi guztiei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun