Ezezagunek igande goizaldean Leioan eragindako suteek 19 edukiontzi eta 8 ibilgailu kiskali zituzten, udal iturriek prentsa ohar bidez zehaztu dutenez. Eraikin baten kanpoko aldeak ere kalteak izan zituen. Tokiko agintarien hitzetan, "suteak herriko hainbat zonalde desberdinetan eman ziren jarraian eta denbora tarte laburrean, goizaldeko 2:13 eta 2:25 artean, hain zuzen ere. Lehenengoko deia Independentzia kaleko herritar batena izan zen, eta azkena Mendibilbarrikoa". Hain zuzen ere, Independentzia kalean bi edukiontzi erre zituzten, Kandelazubietan bi edukiontzi eta ibilgailu bat, Ikean bi edukiontzi eta bi ibilgailu, San Juanen bost edukiontzi eta ibilgailu bat, Mendibilen lau edukiontzi eta Mendibilbarrin lau edukiontzi eta lau ibilgailu. Ertzaintza gertatutakoa ikertzen ari da eta, Leioako Udalaren arabera, "momentuz ez da inongo hipotesirik baztertzen". Hala ere, hasieran, kale indarkeria ekintza bat izan zitekeenik ez zuela uste zabaldu zuen Eusko Jaurlaritzaren Herrizaingo Sailak. Gaizkilea piromano bat izan daitekeela zabaldu dute hainbat iturrik. Argazkian, auto eta edukiontzi bana kiskalita Ikea Mendi kalean / © Leioa.net. Argazki gehiago ikusteko sakatu hemen.
Momentuz, Ertzaintzaren esku dago ikerketa. Gauzak horrela, Erandioko komisariara joan beharko dute beharrezko salaketa jartzera. Baina, horretaz gain, Leioako Udaltzaingoaren egoitzan ireki den kaltetuen erregistrora joatea ere gomendatu du Udalak, bertan datuak hartuko baitizkiete, eta laguntzaren bat edo informazioa eman behar dietenean zuzeneko harremana ziurtatzen da. Kaltetuak hasi dira jada Udalarekin harremanetan: gaur bederatzi pertsona izan dira Udaltzaingoaren bulegoetara hurbildu edo deitu dutenak; ibilgailuen 7 jabe, etxebizitza bateko leioaztar bat eta etxebizitza talde baten presidentea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun