Bizilagun batek sufritutako eraso homofoboa gaitzesteko mozioa "eztabaidatu ere ez" egitea egotzi diote Plentziako Udal Gobernuari
Azaroaren 20an Bilboko Zazpi Kaleetan gertatutako eraso homofoboaren harira, mozio bat erregistratu zuen udaletxean Plentziako ezker abertzaleak, abenduaren 3ko osoko bilkuran, Udalbatzak eztabaida eta onar zezan. Espainiako Alderdiaren Legea aplikatuta, 2007ko udal hauteskundeetan Eusko Abertzale Ekintzak lortutako 228 boto baliogabetu eta 146 boto-paper eskuratu, eta PPri zinegotzia egoki zion Hauteskunde Batzordeak, "talde independentearen eta EAJren konplizitateaz", abertzale eta ezkertiarrek behin baino gehiagotan salatu dutenez. Plentziako ezker abertzaleak berak jakinarazi zuen eraso homofoboa nozitutako pertsonetako bat A.P.B. herriko laguna zela. "Nahiz eta azaroaren 25ean ospatzen den Emakumeenganako Indarkeriaren Aurkako Nazioarteko Egunari buruzko deklarazio instituzional bat egin, arestian aipatutako mozioa ez zuten ezta erantzun ere egin. Gaia eztabaidatzen saiatu ginen, baina ezin. Honek frogatzen du Udal Gobernuaren hipokresia, behin baino gehiagotan salatu dugun moduan", adierazi dutenez. Ostiral gauean 27 urteko gizonezko bat atxilotu zuten aipatu erasoaren egilea delakoan. Argazkian, azaroaren 30ean eraso homofoboak salatzeko elkarretaratzea egin zuten Bilboko Arriaga plazan / © EHGAM.
Batetik, Plentziako Udalak A.P.B. eta E.C.Z. erasotuei "elkartasun osoa" eta "babes morala" adieraz ziezaiela eskatzen zuen mozioan ezker abertzaleak; baita diskriminazio eta eraso sexista eta homofoboak "guztiz mespretxatzen" dituela adieraztea ere. Azkenik, "eraso hauei aurre egiteko, Udalaren baliabide guztiak erasotuen eskura" jartzeko konpromisoa hartzea eskatzen zioten tokiko erakundeari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun