Uribe Kostako pertsona ekintzaileen sariak banatu zituzten atzo, abenduak 10, Uribe Kostako Behargintzak antolatutako Pertsona Ekintzailearen Egunean. Ekitaldia Sopelako Kurtzio kultur etxean egin zen eta horretan esku hartu zuten Imanol Garaik, Emma Calzadak, Ana Isabel Landak; Sopela, Gorliz eta Berangoko alkateak, hurrenez hurren. Baita Javier Bilbao Urdulizko alkateordeak ere. Behargintzako presidentea ere baden Garaik adierazi zuenez, “sari hauen helburua da eskualdeko aberastasun ekonomiko eta sozialean eragina duten tokiko ekintzaileen lana azpimarratzea”. Lehen saria Maria Gilentzat izan zen, Extreme Sport egitasmoagatik, 2.000 euro eskuratuz. Extreme Sport bodyboarda ardatz duen denda bat da. Bigarren saria, 800 eurokoa, Itziar Garciaren pelukeria proiektuak (Peluqueria Itziar) jaso zuen. Argazkian, saritutako lagun guztiak tokiko agintariekin / © Joseba Zubiaur - Sopelako Udala. Argazki gehiago ikusteko sakatu hemen.
Bestalde, Uribe Kostako ekintzaile gazteen egitasmoaren sari banaketa ere egin zen ekitaldi berean. Proiektua Plentziako BHIn eraman da aurrera, 16-17 urteko ikasleekin. Lehen saria batxilergoko bigarren mailako ikasleentzat izan zen, animalien portaera hobetzeko farmakoen egitasmoa dela-eta. Bigarren saria, berriz, "Izan" ekimena garatu duten ikasleek jaso zuten. Ekimen hori tabako hondakinen kudeaketari buruzkoa da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun