Bihar Espainiako Auzitegi Nazionalean hasiko da "Euskaldunon Egunkaria"-ren kontrako epaiketa nagusia, egunkariaren itxiera eragin zuena, alegia. Bertan bost auzipetu jesarriko dira: Joan Mari Torrealdai, Iñaki Uria, Txema Auzmendi, Martxelo Otamendi eta Xabier Oleaga Erandioko semea. Bostei ETAko kide izatea egotzi diete Dignidad y Justicia eta AVT herri akusazioek. Fiskalak, defentsak bezala, auzia ixteko eskatu zuen. Kasu horretan honako eskaerak egin dituzte DyJ eta AVTk:
• Joan Mari Torrealdai. 14 urteko espetxealdia eta 15 urteko inhabilitazioa.
• Iñaki Uria. 14 urteko espetxealdia eta 15 urteko inhabilitazioa.
• Txema Auzmendi. 14 urteko espetxealdia eta 15 urteko inhabilitazioa.
• Martxelo Otamendi. 14 urteko espetxealdia eta 15 urteko inhabilitazioa.
• Xabier Oleaga. 12 urteko espetxealdia eta 14 urteko inhabilitazioa (14 urte, AVTren eskaeran).
Epaiketa 15ean abiatu arren, nazio manifestazioa hilaren 19an, Bilbon, deitu dute auziperatuek. Bestalde, auziaren inguruko informazio eta mota guztiko argibideak "Berria" egunkariak sortu duen atalean irakur daitezke, www.berria.info/egunkaria atalean, alegia. Bertan, jasotzen denez, adibidez, Bilboko martxarekin batera, Madrilen 19an egin nahi zuten "Egunkaria"ren aldeko manifestazioa debekatu dute.
Larunbatean Bilboko manifestaziora joateko dei egin dute Egunkariko auzipetuek
Bihar hasiko da "Euskaldunon Egunkaria"-ren itxierari buruzko epaiketa Madrilen, Espainiako Auzitegi Nazionalean, eta gaur Joan Mari Torrealdai, Iñaki Uria, Txema Auzmendi, Martxelo Otamendi eta Erandioko seme Xabier Oleaga auzipetuek larunbat honetan Bilboko manifestazioan parte hartzeko dei egin diete herritarrei. 17:00etan hasiko da mobilizazioa, Aita Donostia plazan, "Egunkaria libre!" lelopean. Deliturik ez dutela egin berretsi dute bostek. "Burua goian daramagula goaz", esan dute. "Burua goian euskararen alde, euskal kazetagintzaren alde, euskal kulturaren alde, Euskal Herriaren alde, egindakoaz harro gaudelako, horregatik duela zazpi urte atxilotu eta bihartik aurrera epaitu nahi bagaituzte ere". Jendeak urteotan emandako babesa eskertu dute berriz ere. "Orain arte eman digun babes guztia gabe ez ginatekeen, ez gu eta ez gure familiak, burua altxata joango, goazen bezala, epaileen eta akusatzaileen aurrera". Argazkian, "Egunkaria libre!" lelopean, hainbat lagunek egin zuten elkarretaratzea ostiralean Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun