ALBEk iragan uztailean abiatu zuen sariketa. Zehaztutako arauen arabera, bertso-jartzaileek urriaren 1era arte izan zuten nahi adina bertso-sorta bidaltzeko lehiaketara. Epea amaituta, epaimahaiak “lan handia izan du aurkeztutako sorta guztien artean onenak aukeratzen”, zehaztu dutenez. Mirari Azulak, Trino Azkoitiak, Juanjo Respaldizak eta Joseba Santxok osatu dute epaimahaia. Zehazki, bertso-jartzaile hauen lanak saritu dituzte:
Nagusien maila (+18)
1. Aitor Mendiluze (Irura) / Txapela, 1.200 euro eta garaikurra.
2. Nikolas Zendoia (Zarautz) / 900 euro eta garaikurra.
3. Jone Uria Albizuri (Algorta) / 600 euro eta garaikurra.
Gazteen maila (<18)
1. Jone Alberdi (Urretxu) / Txapela, 300 euro eta garaikurra.
2. Ainhoa Mujika (Beasain) / 150 euro eta garaikurra.
3. Imanol Uria Albizuri (Algorta) / 90 euro eta garaikurra.
Aitor Mendiluze bertsolari irurarraren “Nork ez du lorerik entzun?” lanak Balendin Enbeita bertso sariketaren 9. edizioko gailurra jo du, Algortako Bertsolari Eskolak (ALBE) jakinarazi duenez. Txapelketa Nagusiko finalean zazpigarren postua lortutako bertsolariak ispiluarekin izandako elkarrizketa batean oinarritu da saritutako bertso sorta osatzeko. Gazteen mailan, Jone Alberdi urretxuarraren “Bizitzaren bila” lana izan da onena. Etxekoei dagokionez, Jone Uria Albizuri algortarra eta bere neba Imanol hirugarren suertatu dira, 18 urtetik gorako zein beherakoen artean, hurrenez hurren. Sariak larunbat honetan, abenduak 19, banatuko dituzte ALBEk urtero ospatzen duen Ahobien galan. Sari banaketaz gain, Aitor Sarriegi, Onintza Enbeita, Julio Soto eta Jone Uria Albizuriren bertso saioa; eskolako gazteenen emanaldia; urtearen errepasoa argazki bidez; eta agurrerako bertso-sorta ere izango dira ekitaldi horretan, 19:00etatik aurrera, Areetako Andres Isasi Musika Eskolan. Argazkian, besteak beste, igandeko finalean txapela jantzitako Maialen Lujanbiok abestu zuen iazko Ahobien galan. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun