Gaur bertan hasiko da, Leioan, ohikoa bilakatu den Gabonetako Kontzertuen jaialdia. "Herriko abesbatzak eta musikarik onena ikusteko aukera ematen digun ekitaldia da", udal iturriek aipatu dutenez. Festari hasiera emateko arduraduna Leioako Gazte Orkestra izango da. Esan bezala, gaur bertan arituko da, 20:30etik aurrera, Kultur Leioako auditorioan. Sarrera 3 eurotan izango da. Gainontzeko kontzertu guztiak leku berean izango dira, baina ez ordu berean. Beraz, adi egon. Bihar, 20:30ean La Kantoria izango da taula gainean eta, ondoren, San Juan Bautista abesbatza. "Bikote ezinhobea arratsalde on bat igarotzeko", tokiko iturrien arabera. Igandean, jaialdiari amaiera emateko, Orpheo Ganbera Abesbatza eta Leioako Musika Banda izango dira Kultur Leioan, 19:30etik aurrera. Aurten, artista gonbidatua Chrismas Blues taldea izango da: ostiralean joko du, 21:00etan, eta sarrera 10 eurokoa izango da. Argazkian, azaro bukaeran Asturiasen hainbat sari irabazi zituen San Juan Bautista abesbatzak ere kantatuko du Gabonetako Kontzertuetan / © Leioa.net.
Gabonetako musika tradizioak, ematen duenaren kontra, sormenerako espazio zabala eskaintzen du. Christmas Bluesek gabon-kantarik ezagunenen ikuspegi entretenigarria eta berriztatua eskaintzen du. Blues, gospel, soul, jazz, dizzy eta rag time estiloekin interpretatutako "Adeste Fideles", "Noche de Paz" edo "Joy to the world" abestien bertsio originalak entzun ahal izango dira Kultur Leioako entzungelan. Jose Luis Gutierrez saxofonista ospetsuaren gidaritzapean, Velma Powellen (Vargas Blues Band eta Orquesta Mondragon taldeekin aritu da, besteak beste) ahots paregabeaz gozatzeko aukera egongo da. Berarekin batera arituko dira Chema Saiz (gitarra), Iñigo Azurmendi (kontrabaxua) eta Tomasso Caggiani (bateria).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun