Errusiako hiru eskualde horietako agintariei Euskal Autonomi Erkidegoan gaitza kontrolpean dagoela ikustarazten saiatu ziren Bikarteko arduradunak, eta beste herritar guztiek bezala errusiar umeek ere beharrezko osasun babesa izango zutela. "Ahalegin horietan, Eusko Jaurlaritzak gogor ekin zion. Hala eta guztiz ere Errusiako administrazioak 63 ume hauek harrera programatik kanpora ateratzeko erabakiari eutsi zion", gaineratu dutenez.
Udako programa prestatzen
Dagoeneko 2010eko uda programa antolatzen ari da Bikarte: aldi baterako, harrera horretan parte hartzeko prest egongo liratekeen 40 familia berriren bila dabil elkartea. Hori dela eta, batzar informatiboa antolatu dute interesaturik egon daitezkeen sendientzat. Bilera bihar bertan, abenduak 18, egingo dute, Gabonetan abegian hartutako umeak Loiura heldu baino ordu batzuk lehenago. Hitzordua 19:00etan jarri dute, Deustuko udal zentroan, Bilboko Agirre Lehendakaria Etorbideko 42. zenbakian. Beste hainbat batzar ere prestatzen ari da abendu eta urtarrilerako Bikarte, Araba, Bizkaia eta Gipuzkoako beste horrenbeste udalerritan. Udan 130 neska-mutil ekarri nahi ditu gurera errusiar umeen harrerarako elkarte ongileak. Dagoeneko lehenik ere haurrak hartu dituzten 90 familia badauzkate. Horregatik behar dituzte beste 40 sendi.
Ostiral honetan, abenduak 18, iritsiko dira Loiuko aireportura, 23:00ak aldera, Bikarte errusiar umeen harrerarako elkarte ongileak abegi egindako hamar neska-mutilak. Briansk eskualdeko familia behartsuetako kideak dira ume horiek. "Euren egoera sozio-ekonomikoa dela eta, Chernobilgo istripu nuklearrak eraginiko erradiazioak kutsatzen duen herrialdean bizitzera beharturik daude", Bikartek azaldu duenez. Gaztetxoak hilabetez izango ditugu gure artean eta, denbora horretan, harrera familien maitasuna eta zaintzak jasotzeaz gain, ekintza kultural batzuk ere izango dituzte. Gainera, hamar haur horietako batek, 9 urteko neskatoak, Leioako sendi batekin igaroko ditu Gabonak, Bikarteko kideek UKBERRI.NETi jakinarazi diotenez. Hala ere, harrera programa osatzen zuten Murmansk, Mendebaldeko Siberia eta Volgogradoko umezurtz-etxetako 63 gaztetxo, etortzeko aukerarik gabe geratu dira. Arrazoia, elkarteak lehengo astean plazaratu zuen bezala, errusiar osasun agintariek A gripearen aurrean emandako "gomendioa" da. "Gomendioak dio ume taldeek ez dutela atzerrira bidaiatu behar, A gripea harrapatzea ekiditeko", azaldu dutenez. Argazkian, Aljeriako saharar errefuxiatuen kanpamenduetatik eta Ekialdeko Europatik (Errusia, Ukraina eta Bielorrusia) etorritako 45 umek bisitatu zuten Getxoko udaletxea, 2008ko uztailaren 4an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun