Erakusketa bisitatzeko era
Urtarrilean, ikastetxeetako ume eta gazteak eraman nahi dituzte erakusketa ikustera eta, bide batez, Zientzia eta Teknologia Fakultatea bisitatzera. Bisita partikularrak ere egin daitezke. Nolanahi ere, komenigarria da kide ugariko taldeek aurrez horren berri ematea. Edozein zalantza izanez gero, eta taldeko bisitak egiteko izena eman nahi izanez gero, EHUko Zientzia eta Teknologia Fakultateko Estrategia eta Paleontologia Saileko Xabier Murelagarekin jarri behar da harremanetan, xabier.murelaga@ehu.es helbidean.
"Koloso Jurasikoak" erakusketak informazio panel entretenigarriak, jatorrizko dinosauro fosilak, dinosauro hezurren erreprodukzioak eta ikus-entzunezkoak eskaintzen ditu. Hori guztia munduko dinosaurologian ezagunenak diren Jurasiko amaierako eta Kretazeo hasierako formazio geologikoetako hirurekin erlazionatuta dago. Formazio horiek bertan aurkitutako dinosauro aztarnategien kopuruagatik dira enblematikoak; honako hauek dira: AEBetako Morrison formazioa, Tanzaniako Tendaguru formazioa eta Espainiako Villar del Arzobispo formazioa.
Europako dinosaurorik handiena
Errepliken artean, aparteko zenbait eskeleto elementu egongo dira ikusgai, besteak beste, Europako dinosaurorik handienaren (Turiasaurus riodevensis) aurreko hanka eta Teruelgo herrietan aurkitutako oinatz mota ezberdinak. Horrez gain, AEBetatik ekarritako jatorrizko sauropodo fosilak ere ikusi ahal izango dira. Era berean, erakusketak Camarasurus sauropodoaren berreraikuntza ere izango du, 1:6 eskalan, baita bost metroko luzera zuen Camptosaurus ornitopodoaren eskeleto osoaren erreplika bat ere.
"Koloso Jurasikoak" dinosauroei buruzko erakusketa irekiko dute bihar campusean
"Koloso Jurasikoak" erakusketa zabalduko da bihar, ostiralarekin, EHUko Leioa eta Erandioko campuseko Zientzia eta Teknologia Fakultatean. Erakusketan, bertaratzen direnek hiru kontinenteetatik bidaiatu ahal izango dute dinosauroen garaian, antolatzaileek gaur jakinarazi dutenez. Erakusketa Aragoiko Dinopoliseko paleontologoek prestatu dute, EHUko Zientzia eta Teknologia Fakultateko Estratigrafia eta Paleontologia Sailarekin batera, eta Espainiako Zientzia eta Teknologia Fundazioaren diru-laguntzaz. Erakusketaren bidez, batetik, geologoek arroka sedimentarioetan eta hauetako fosiletan irakur ditzaketen istorio liluragarriak eskola ingurunera eta gizartera hurbildu nahi dira eta, bestetik, unibertsitatea eta, bereziki, Leioa eta Erandioko campusa jendearengana oro har gerturatu. Erakusketa bihartik otsailaren 10era egongo da zabalik, larunbat eta igandeetan, abenduaren 24an, 25ean eta 31n eta 2010eko urtarrilaren 1ean eta 6an izan ezik. Ordutegi jarraitua izango du, goizeko 8:00etatik arratsaldeko 20:00etara. Argazkian, Teruelgo Dinopolis parkearen sarrera / cc-by Gaudiramone - Qlio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun