Espainiako Auzitegi Nazionaleko 2. atalak 46 urteko espetxe zigorra ezarri die Irantzu Gallastegi Berangoko euskal preso politikoari eta bere bikotekide Xabier Garcia Gaztelu "Txapote" galdakoztarrari, Jose Ignacio Iruretagoyena Zarauzko PPko zinegotziaren hilketa egotzita. 1998ko urtarrilaren 9an, bonba-auto batek eragin zion heriotza ordezkari popularrari. Europa Press albiste agentzia espainolak zabaldu duenez, Iruretagoyenaren senideei kalte-ordaina ere eman beharko diete: Maria Jose Imaz Aizpuru zinegotziaren emazteari 1.652,78 euro ordaindu beharko dizkiote kalte materialengatik eta 200.000 euro kalte pertsonalengatik. Eta Eneko eta Mikel Iruretagoyena zinegotziaren semeei 100.000 euroko kalte-ordaina eman beharko diete. Horretaz gain, beste 952,44 euro eman beharko dizkiote Zarauzko Udalari. Era berean, ezin izango dira Iruretagoyena familia bizi den tokira hurbildu, edo behintzat 500 metroko tartea zaindu beharko dute. Epaiketa maiatzaren 28an egitekoa zen, baina bista bertan behera uztea eskatu zuen Blanca Martinez fiskalak, deklaratu behar zuen "lekuko nagusietako bat" ez zegoelako. Azkenean, abenduaren 10ean epaitu zituzten. Argazkian, Gallastegi eta Garcia Gaztelu 2006ko ekainean egin zieten epaiketan / publicdomain Etengabe.
Irantzu Gallastegik 1994ko azaroan ihes egin zuen, ETAren Bizkaia komandoko ustezko hainbat kide atxilotu zituztenen garaian, eta 1999ko martxoaren 9an atxilotu zuen Frantziako Poliziak, Parisen, ETAko kide izatea egotzita. Geroago, aldi baterako Espainiako Justiziaren esku utzi zuen Frantziakoak berangoztarra, Espainiako Auzitegi Nazionalean epaiketa egiteko. 2003an, berriz ere Frantziara eraman zuten, gelditzen zitzaion espetxe zigorra han betetzeko. Zigor hura osorik bete ostean 2005eko ekainaren 14an estraditatu zuten. Espainiako Justiziak, besteak beste, 1993 eta 1999 bitartean, Bizkaia eta Donostia komandoetan aritu izana eta Fernando Mugica Herzog abokatua eta Miguel Angel Blanco Ermuko zinegotzi popularraren heriotzetan parte hartu izana leporatzen dizkio. Azken hori egotzita, 50 urteko espetxe zigorra jarri zioten berangoztarrari, 2006ko uztaila hasieran. Martxoaren 14an, A Coruña aldeko Curtis-Teixeiro espetxera aldatu zuten Xabier Garcia Gaztelu "Txapote", bere bikotekide Irantzu Gallastegi berangoztarra eta Arane alabarekin egon ahal izateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun