Metro Bilbaok zerbitzu bereziak jarri ohi ditu "gertakari publiko interesgarriren bat" dagoen guztietan. Jendeari kasu egiteko eta segurtasuneko langileak ere gehituko dira. Izan ere, erabiltzaile samaldak espero dituzte astelehenerako: 350.000 joan-etorri baino gehiago izango direla aurreikusten dute, konpainiako arduradunek. Hain zuzen ere, 2007ko San Tomas egunean dago metroaren egun bakarreko bidaiarien errekorra, guztira 378.505 bidaia zenbatuta.
Fitori entzuteko zerbitzu berezia
Era berean, bihar, larunbata, Barakaldoko BECen Fito & Fitipaldis-en kontzertua (22:00) izango denez, beste zerbitzu berezi bat jarriko da martxan Metro Bilbaok, 17 tren gehiagorekin. Emanaldia amaitzen den orduaren arabera aurreratu ala atzeratuko da zerbitzu berezi hori.
Gabon Gaua eta Eguberria
Metro Bilbaok bezeroei gogorarazi die abenduaren 24ko eta 25eko tren zerbitzuak ez direla edozein lanegun edo jai egunetakoen berdinak izango. Ordutegia urte osoan eskaintzen denaren antzekoa izango bada ere, Gabon Gauean iluntzeko 9etan amaituko da, eta Eguberrian, berriz, goizeko 11etan hasiko da, gutxi gorabehera. Ondokoak izango dira lehenengo eta azkeneko trenak:
- Abenduak 24, osteguna: Gabon Gauean, azkeneko trenak Plentziatik, 20:20an; Santurtzitik, 20:40an; eta Etxebarritik 21:01ean Santurtzirantz eta 21:06an Plentziarantz abiatuko dira.
- Abenduak 25, ostirala: Eguberrian, lehenengo trenak Etxebarritik, 10:48an; Santurtzitik, 10:51n; eta Plentziatik, 11:00etan irtengo dira.
Metro Bilbao garraio enpresak tren zerbitzu berezia jarriko du martxan astelehen honetan, abenduak 21, Bilbon ospatuko den Gabonetako San Tomas azoka tradizional eta jendetsurako eskaria asetzeko. Konpainiako iturriek zehaztu dutenez, zerbitzua nabarmen gehituko da. Guztira, 730 tren ibiliko dira, astelehen buruzuri batean baino 77 gehiago. Gainera, trenen maiztasunak ez du gorabehera handirik izango egun osoan: goizeko 7:20etik 20:30era bitartean, 2,5 minutukoa izango da enborrean (Etxebarri-San Inazio), eta 5 minutukoa Etxebarri eta Santurtzi artean. Etxebarri eta Bidezabal arteko garraioei dagokionez, 10 minutuan behin joango dira trenak Larrabasterraraino, eta 20 minutuan behin Plentziaraino. Baita alderantzizko norabidean ere. "Horrela, garraioa erraztu nahi zaio milaka pertsonari, jaia gozatzeko asmotan dabiltzanei aukera seguruagoa eskainiz, automobilik hartu beharrik izan ez dezaten", garraio enpresako arduradunek adierazi dutenez. Argazkian, barazki postua beste azoka batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun