Plentzia, Gorliz eta Lemoizko ezker abertzaleak zabaldutako oharra:
Xabi askatu!
Pasa den barikuan Gorlizen gure laguna, kidea, auzokidea, Xabi, polizia espainolak atxilotu zuen. Segi gazte erakundearen kontrako operazioaren baitan atxilotu izan dute: poliziek Xabiren lagunak pistolagaz mehatxatu zituzten, zer gertatzen zen galdetzera joan zirenean.
Xabi, beste hainbat gaztek bezala, herria hobetu eta aldatu nahian ibili da betidanik. Xabik, beste hainbat gaztek bezala, ikasten du. Xabik, beste hainbat gaztek bezala, kirola maitatzen du. Xabik, beste hainbat gazt bezala, bere koadrilarekin jaiez gozatzen du. Xabik, beste hainbat gazt bezala, lan egiten du. Xabik, beste hainbat gaztek bezala, musika egiten du. Xabik, beste pertsona guztiek bezala, bere familia maite du. Xabi gure laguna da! Zein da bere delitua? Gazte eta aske izatea! Xabi, Euskal Herriko hainbat gazte bezala, ez da bere ideiengatik atxilotua izan, baizik eta atxilotu dituzten ideiengatik, euskal gazteriarengan duten beldurragatik.
Guzti honen aurrean ezin gara isilik geratu, hori baita espainiar eta frantses gobernuek nahi dutena. Bakoitzak bere esparruan (etxean, ikastetxean, unibertsitatean, musika taldean, lokalean, gaztetxean, kirol taldean...) ekin dezagun batera egoera honen aurka. Jakin dezatela ez dugula etsiko Xabi askatu arte, sistema hau suntsitu arte.
Gazte eta aske irabazi arte!
Fernando Grande Marlaska Espainiako Auzitegi Nazionaleko epaileak Xabier de la Maza Peña 21 urteko gazte gorliztarra espetxeratzeko agindu du, Segi "erakunde terroristako kide" delakoan. Uribe Kostako Amnistiaren Aldeko Mugimenduak Etengabe bitakoraren bitartez baieztatu duenez, gaur goizean pasa da epailearen aurretik. Pasa den ostiralean atxilotu zuten De la Maza, Gorlizen, bere etxetik gertu zela. Epailearen arabera, azaroaren 24tik Segi gazte erakundearen aurka egindako operazioa egin zutenetik, ihes eginda zegoen De la Maza, eta Espainiako Auzitegi Nazionalak hura atzemateko agindua emana zeukan. Hain justu, Guardia Zibilak eta Espainiako Poliziak 35 gazte atzeman zituzten azaroan, beste bat abenduaren 2an. Haietatik 32 kartzelara bidali zituen epaileak, Segi "erakunde terroristako kide" izatea leporatuta. Beste laurak baldintzapean utzi zituen libre. Azaroaren 28an milaka lagunek salatu zuten gazte independentisten aurkako sarekada, Bilbon egindako manifestazioan. Argazkian, Plentziako zubi ondoan jarritako pankarta / © Plentzia, Gorliz eta Lemoizko ezker abertzalea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun