Urtzi Paul Larrea gazte algortarra atxilotu du gaur, 17:15ean, Espainiako Polizia Nazionalak, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Getxoko familiako etxetik bere andrearekin autoa hartzera irten denean, poliziak bidea moztu, Espainiako Auzitegi Nazionaleko agindua zutela esan eta eraman egin dute. "Familiakoek ez dakite nora eraman duten. Izan ere, Getxoko auzitegian ezer ez dakitela esan diete, eta espetxera eraman aurretik, Bilboko polizia-etxera eraman dutela pentsatzen dute, edo beharbada agindua eman duen, edo horren izenean jardun duen epaitegira", azaldu du errepresioaren kontrako erakundeak. Pauli 5 urteko espetxe zigorra ezarri zioten joan zen urtean. "Kale borrokako ekintza batean parte hartzea leporatu zioten, Ertzaintzak torturapean sinarazitako deklarazioetan oinarrituta", AAMk salatu duenez. 2004ko urrian atxilotu eta urte bat bete zuen, espetxealdi prebentiboan. Epaiketaren ostean, zain zegoen noiz betearaziko zioten zigorra. Argazkian, mobilizazio bat Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun