Espainiako Polizia Nazionalak atzo atxilotu zuen Urtzi Paul Larrea gazte algortarrak gose grebari ekin dio. Protesta horri heltzeko arrazoia izan da gaur Basauriko espetxera eraman dutenean preso arrunt batekin jarri izana. Gaur iluntzean, Algortan 100dik gorako auzokide bildu dituen manifestazioaren ostean jakinarazi du egoera (mp3) Amnistiaren Aldeko Mugimenduak. Zabaldu dutenez, atzo 17:30ean atxilotu zuten Urtzi Paul, etxetik irteten zenean emaztearekin batera eta handik Bilboko Indautxuko Komisarian garraiatu zuten. Bertan egon da gaur goizeko 12ak arte. Ondoren, epaitegira eraman dute paperen bat hartzeko eta handik Basauriko espetxera sartu dute, ziega berean "preso arrunt" bat egokituz. Paulek "hori ez duela onartzen" eta isolamenduan sartzeko eskatu du baina ezetz esan diote. Hori dela eta, gose grebari ekin dio. Gainera, senideei jakinarazi dienez, "asteburuan horrela jarraitzen badu egarri greban" ere jarriko da. Paul iaz jarritako 5 urteko espetxe zigorra betearazteko atxilotu zuten. Berak eta epaitutako gazte guztiek salatu zuten "torturen bidez deklarazioak sinatzera behartu" zituela Ertzaintzak. Argazkian, manifestazioa egiten zen bitartean, Ertzaintzak Xabi de la Maza espetxeratutako gorliztarraren aldeko pankarta bat kendu eta eraman du Algortako Telletxe kaletik. "Atxilotuak askatu. Euskal gazteria aurrera! Ta segi aurrera! Xabi etxera" zioen plastikoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun