Uribe Kostako Mankomunitateko Euskara Zerbitzuaren bitartez, Gabonetarako zenbait ekintza antolatuko ditu, euskaraz olgatu nahi duten gaztetxoentzat, Plentziako Udalak. Astelehenean, abenduak 28, Jakin eta Jolas pailazoak izango dira frontoian, 12:00etatik aurrera, 3 eta 12 urte arteko neska-mutilentzat. Hurrengo egunean, berriz, barreterapia tailerra izango dute, 13 eta 30 urte arteko gazteek, 16:00etatik 20:00etara. Izena aldez aurretik eman behar da Goñi Portal kultur etxean. Plaza mugatuak dira. Azkenik, hilaren 30ean, asteazkenarekin, “Arrantzaleen jolasak” izango dira (Adina: 3-12 urte), 12:00etatik aurrera, frontoian, Kulkiren eskutik. Hala ere, guzti horren aurretik, Olentzerok bisitatuko du Plentzia. Ostegun honetan, 18:30ean abiatuko da zubitik kalejira, dantza talde, jentil, sorgin, idi eta ardiez lagunduta. 19:15ak aldera helduko dira Eleiz plazara, bertan, Olentzeroren antzezpena egiteko. Argazkian, Uribe Kostako gainontzeko herriak ere bisitatuko ditu Olentzerok, Itzubaltzeta / Romo horien artean / © Getxo.net.
Barreterapia tailerrari dagokionez, izen-emate orriak eskura izango dira Goñi Portalen, taldea bete arte. Plentzian erroldatuak lehentasuna izango dute. Dena den, antolatutako ekintzen inguruan informazio gehiago eskuratu nahi duenak 946 775 541 telefonora deitu edo kultura.plentzia[abildua]bizkaia.org helbide elektronikora idatz dezake.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun