Getxoko PPk PSE-EEri errieta egin dio udal aurrekontuak "babestuko" dituelako
Getxoko PPk atzo aurkeztu zituen EAJren Gobernu Taldeak landutako aurrekontuei aurkeztuko dizkion zuzenketak. Ezustekorik ez badago, gaurko udal osoko bilkuran onartuko dituzte behin-behinekoz. Izan ere, Luis Almansa Getxoko PSE-EEko bozeramaileak orain bi aste iragarri zuen bozketan abstentzioaren hautua egingo dutela (Europa Press, espainolez), "garai latz hauetan, oposiziotik, erantzukizunez eta herritarren hobe beharrez jokatuz". Hala ere, Manu Basanta Alternatiba alderdiko zinegotziaren boza ere erabakigarria izan daiteke, udal aurrekontuak onartu edo ez onartzeko. Joan den ostiralean ere prentsaurrekoa eman zuten Marisa Arrue eta Eduardo Andrade tokiko popularren ordezkariek. Horretan, Almansak buru duen alderdiarentzat izan ziren hitz gogorrenak: "berriro ere gezurretan ari zaie herritarrei Getxoko PSE. Gezurretan zebiltzan hauteskundeetara EAJ paretik kentzeko aurkezten zirela esan zutenean. Gezurretan zebiltzan, hauteskunde-emaitzen ostean, alkatetzan aldaketa ahalbidetuko zutela esan zutenean. Eta gezurretan dabiltza orain, abstenituko direla dioten arren, guztiok dakigulako datorren asteazkenean (gaurko udal batzarrari buruz) PSEk EAJren aurrekontuen alde bozkatuko duela, berriro ere frogatuz eurei botoa ematea zaramara botatzea izan zela", adierazi zuen Arruek. PSEkoak jelkideen "morroitzat" jo ostean, "boz baliagarri bakarra" popularrena dela gaineratu zuen Getxoko PPren bozeramaileak, "baldin eta hurrengo udal hauteskundeetan EAJ kanporatu nahi badugu". Argazkian, Jesus Toca, Marisa Arrue eta Eduardo Andrade Getxoko PPren ordezkariak aurreko prentsaurreko batean.
EAJren Gobernu Taldeak aurkeztutako aurrekontuei dagokionez, "Getxoko bizilagunentzat ustelak" direla aipatu zuen Arruek, besteak beste, "etxebizitza, Areetako geltoki plaza eta Gobela ingururako dirurik aurreikusten ez duelako". Getxoko PPk aurkeztutako osoko zuzenketa eta zatikako beste 9 (orotara, 7.115.000 euroko zenbatekokoak), "gastu arrunta murriztu zein merkataritza, enplegua eta ekonomia" suspertzera bideratuta daude. Gobelako desjabetze funtserako eta Areetako azoka azpiko parkingerako eskatutako 500.000na euro ere aipatu zuzenketetan jasota daude. Baita Areetako Xake plazako lanetarako zein beste parking baterako milio bai euro ere; diru hori Informazio eta Komunikazio Arloko gastu arrunta murriztuta atera ostean. Tasen eta zergen jaitsiera, berriz, euskal kultura sustatzeko arloan gastu arrunta zein presoen senideentzako eta Udalbiderako laguntzak murriztuz lortu nahi du Getxoko PPk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun