Gazte Asanblada Sopeloztarrak Sopelako Lizarre auzoko (metro geltokiaren atzekaldean) Sekeko errota okupatu eta bertan gaztetxea zabaldu zuen pasa den larunbatean, hilak 19. Sekeko gaztetxea antzinako errota eta korta banak osatzen dute eta azpiegitura "oso egoera onean" dagoen arren, gazteek "lan eskerga" izaten ari dira dena garbitu eta txukuntzeko. Hori dela eta larunbatean auzolanak abiatu zituzten eta lan egiteko prest dagoen gazte orori bertatik pasatzera gonbidatu diote. GASeko kideek atzo Koska irratiko "Gazte Uhinak" irratsaioari azaldu bezala (mp3), ez da azken asteotan okupatzen saiatu diren eraikin bakarra. Izan ere, aurretik bi saiakera egin dituzte, azkena Larrabasterran. Bertan, "urte luzez inork erabiltzen ez zuen etxe bat" ikuskatzen aritu ziren abenduaren 12an, baina hurrengo egunerako jada Ertzaintzak lurrak hartu eta jabearen ordezkari batek etxea eta lursaila hormatu zituen. Argazkian, Sekeko gaztetxea barrutik / © Txorimalo gaztetxea.
Bestalde, GASek kritikatu ditu Sopelako Udalak gazteriaren inguruan darabilen politika eta eskaintza eza. Gainera, Udalari egindako eskakizunen aurrean "erantzunik eta irtenbiderik gabe, esku hutsik itzuli izan gara beti" diote. Hori dela eta gazteon aisialdirako alternatibarako "gune sortzaile eta autogestionatua" aldarrikatzeaz gain, orain dela hilabeteak gaztetxe proiektua aurkeztu zioten Udalari. "Baina beste behin ere, eskuak garbitu eta arazoaren aurrean ezikusiarena eginez, ezezko borobila eman ziguten", GASeko kideek gogoratu dutenez. Horregatik, Gaztetxe Zaharra, Eskola Gorriak, Igeltsera eta Ganebarri aurreko gaztetxeetan bezala okupazioari eta autogestioari ekin dizkiote.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun