Joan den astean egindako kontsumismoaren aurkako jardunaldien harira, ondoko idatzia plazaratu zuen Algortako Gazte Asanbladak:
Kapitalismoa suntsitu!
Erosi, erosi eta erosi. Gabonak datoz eta erosi egin behar da. Gaur egungo gizarte honek, kontsumoaren gurpilean harrapaturik, erosketetan eta kontsumo masibo irrazionalean bilatzen du zoriontasuna. Asetzen ez garenez, kontsumitzeko nahia ez da eteten. Baina ondo pentsatuta, erosi eta kontsumitzen dugun guztia behar al dugu? Produzitzen dugun zabor guztia sortu behar al dugu? Eta jarri al gara pentsatzen inoiz horrek eduki ditzakeen ondorioetan?
Algortako Gazte Asanbladak beste gizarte eredu batean sinetsiz, kontsumismo honetatik ihes egiteko hautua egin du. Gauzen berrerabiltzeko aukera azpimarratu nahi du, produzitze-kontsumo neurriak jaitsi, eta bide batez amalurraren baliabideak errespetatuz.
Energiaren erabilpena ere neurriz kanpokoa da, Gabonetako argien kontsumoa esaterako. Guzti honen aurrean zer esan badaukagula uste dugunez, gure kontsumitzeko modua eta jarrera hobetu dezakegula badakigu. Beraz, Txorimalo gaztetxeak antolatutako ekitaldietan parte hartzeko gonbita luzatzen dizue. Guztiok batera kontsumismoa apurtu!
Kontsumismoaren aurrean berrerabilpena eta trukea lehenetsi ditu Algortako Gazte Asanbladak
Gabon garai hauetan hain ohikoa den "sukar kontsumista" salatzeaz gain, bestelako aukerak ere badaudela erakusteko asmoz, goiz zein arratsaldean truke azoka herrikoia jarri zuen Algortako Gazte Asanbladak (AGA), joan zen larunbatean (hilak 19), Telletxe plazan. Kartel batzuk jarrita eta SMS mezuak bidalita, zabalpen handia eman ez bazioten ere, arrakastatsua suertatu zen ekimena. Baten batzuk erdi muturtuta gerturatu ziren arropak, liburuak, diskoak eta jostailuak pilatzen ziren mahaietara, une horretan enteratzen ari zirelako azoka zegoela. Hala ere, lehenengo haserrealdia alde batera utzita, etxera arrapaladan joan eta arropaz betetako poltsez bueltatu zen bat baino gehiago. Azokaren arrakasta ikusita, gehiagotan, hobeto eta handiago egitea ez du baztertzen AGAk. Argazkian, joan den larunbateko truke azoka Algortan. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun