Hatortxurock jaialdia, bere 7. ediziotik aurrera urtarrilean izan da eta 11. edizioan ere urteko lehen hilabetea aukeratu dute berau egiteko; bestalde, iazko esperientziaren ondoren, "Hator, hator neska mutil etxerat" lelopeko festibala egun bakarrekoa izango da berriro ere, oraingoan urtarrilaren 9an, larunbata, eta oraingoan ere bi karpa izango ditu. Kontzertuak 18:30ean hasiko dira eta “entre-cementerios” ezizenez ezagutzen den Atarrabia eta Burlata arteko gunean egingo dira. "Azken 5 urtetan, Hatortxurock jaialdia Berriobeitiko herrian burutu dugu, baina berriro ere arrazoi ezberdinengatik gure kokalekua aldatzeko beharrean ikusten gara", azaldu dute antolatzaileek. Bide batez, Berriobeitiko herriari eskerrak eman dizkiote, "bost urte hauetan egin digun harreragatik eta jarri dizkigun erraztasun guztiengatik". "Eta noski, eskerrak emateko orduan, ezin dugu ahaztu Atarrabiako herriak proiektu honetan jarritako konfiantza. Mila esker Atarrabia", gaineratu dutenez. Aurtengo Hatortxurock jaialdian S.A., Def Con Dos, Ken Zazpi, Obrint Pas, Bizardunak, Goar Cicatriz, Boikot eta Trikidantz taldeek joko dute. Sarrerek 20 euroko prezioa izango dute, aurrez erosita, eta 25 euro leihatilan bertan. Txartelak Leioako Kurkudi tabernan eros daitezke; baita Internet bidez ere, urtarrilaren 5era arte. Argazkian, Hatortxurocken 10. edizioaren irudi bat / © Hatortxurock.
Kontzertuak bi eszenatokitan egingo dira, aipatutako karpa erraldoi banatan, eta karpa bakoitzean 4 taldek joko dute "modu intermitentean", antolakuntzatik zehaztu dutenez. Festa osatzeko hainbat DJ egongo dira, une horretan kontzerturik ez dagoen karpan musika jarriz. "Bestelakoan zoritxarrez gauza gutxi gehitzeko: urtero bezala jendartea sentsibilizatzen saiatzea, 2009. urtearen bukaeran 760 euskal preso politiko baino gehiago egongo direla espainiar eta frantziar kartzeletan dispertsatuta. Kopuru hau historikoa da, izan ere 1969tik ez da hainbeste preso inoiz egon, 2000tik hona kopuru hau urtero urtero handituz joan baita, salbuespenik gabe", adierazi dute antolatzaileek. Gauzak horrela, beste behin ere iritsi da "Hatortxurock. Hator, hator neska mutil etxerat", "beraiek gogoan izateko eta mundu guztiari gogorarazteko euren senide eta lagunek inoiz baino kilometro gehiago egin behar dituztela beraiek bisitatzeko… horrek dakarren arrisku eta diru-galerarekin", aipatu dutenez. Horri guzti horri, gainera, beste hainbat traba gehitu behar zaizkio, antolatzaileen arabera, hala nola, "azken aldiko baldintzapeko askatasunaren ukatzea, askatasuna berreskuratzeko trabak, izan preso gaixoena (92. artikulua ukatuz) izan euren zigorra osorik bete dutenei askatasuna lapurtzea (“Parot dotrina” delakoari jarraituz), senideak azken aldian bisitetan pairatzen ari diren umiliazio eta xantaia saiakerak, edo, gaur egungo egoeran, edonor izan daitekeela goiz ala berandu kolektibo honetako kidea, pentsatzeagatik soilik…" Amaitu dutenez, "horregatik guztiagatik jabetu gaitezke Hatortxu beste urte batean antolatzearen beharraz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun