Sopelako Udalbatzak onartutako akordioaren bidez, edateko uraren banaketa-zerbitzu sarean gertatutako matxurak Bilbao Bizkaia Ur Partzuergoak berak konponduko ditu, Udal Sareak SA sozietatearen bitartez. Horretarako, bezeroen arretarako telefono zenbakia ere jarri dute: 944 873 187. Telefono zenbaki hori izaera komertzialeko operazio ugari egiteko erabil daiteke; halaber, 2010ko urtarrilaren 1etik aurrera, Sopelako udalerriko edateko uraren banaketa-sarean gertatzen den edozein matxura jakinarazteko ere erabili ahal izango da, tokiko iturriek zehaztu dutenez. Eguneko 24 ordutan egongo da erabilgarri telefono zenbaki hori. Urte berri egunetik aurrera, beraz, Bilbao Bizkaia Ur Partzuergoa arduratuko da edateko uraren banaketa-zerbitzuaz, horrenbestez, bere eskuetan egongo dira bai banaketa-sareen mantenua, bai hargune berriak egiteko ardura. Argazkian, herri-lanak Sopelan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun