Koldo Ortiz de Gineak eta Enrique Noya "Kini"k osatutako bikoteak irabazi zuen atzo Itzubaltzeta / Romon jokatutako Euskal Herriko Mus Txapelketaren kanporaketa. Branka herriko tabernan, Getxo udalerri osoko hamabi bikotek hartu zuten parte eta, Ortiz de Gineak onartu duenez (mp3), "partida gogorrak" bizi ziren. Salbuespen bakarra kanporaketako finala izan zen. Partida horretan, Venancio Perez eta Aitor Martin itzubaltzetarrek algortarren aurka 1-3 galdu arren, "lasai-lasai" zeudela azaldu zuten, bigarren taldea izateak hurrengo mailarako sailkatzea ahalbidetzen baitu. Horrela, atzo sailkatutako bi bikoteek otsailean Bizkaiko finala jokatuko dute Durangon. Argazkian, sailkatutako bi bikoteak kanporaketako finalean.
Baina atzokoa ez da eskualdean burutuko den kanporaketa bakarra. Gertuena Leioan izango da, urtarrilaren 9an, larunbatarekin. Bertako mus partida Ganeko tabernan izango da, arratsaldeko 16:00etan. Era berean, Berangoko sailkapen partida urtarrilaren 16an izango da, larunbata, Sei Herri herriko tabernan, arratsaldeko 4:30ean. Bestalde, Sopelan eta Urdulizen ere kanporaketak burutuko dituzte, baina antolatzaileek ez dute zehaztu oraindik bertako proben deialdiak. Partida bakoitzetik, jokatuko duten bikoteen arabera, bat, bi , hiru edo lau bikote sailkatuko dira herrialdeko kanporaketarako, otsailean Durangon jokatuko dena. Txapelketaren finala Seguran izango da, martxoaren 20an. Musaren olinpiada Orreaga eta Iparra-Hegoa elkarteek eta Bai Euskal Herriari ekimenak antolatu dute. Besteak beste, AEK, "Berria", "Gara", "Deia" eta Info7 irratiak laguntzen dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun