Ia 3.000 lagunek bisitatu dute Romo Kultur Etxearen proiektuari buruzko erakusketa
Getxoko Udalak emandako datuen arabera, ia 3.000 lagun igaro dira jada Romo Kultur Etxea izeneko udal eraikin berriaren proiektuari buruzko erakusketa ikustera. "Joan den abenduaren 15ean publikoarentzat zabaldu zenetik eta atzo, astelehen eguerdira arte, asteburuko egunetan 500 bat lagun eta lan egunetan 100 bat pasa direla uste da. Astean zehar Romoko eta Areetako auzokideak hurbildu dira gehien eta asteburuetan udalerriko beste auzoetako bizilagunak", zehaztu dutenez. Itzubaltzeta / Romoko Santa Eugenia plazan eraikiko dute kultur aretoa eta, erakusketa bera, aipatu plazan Getxolandiarako jarritako karpan egongo da ikusgai, urtarrilaren 5era arte. Ordurako proiektua ikustera 5.000 pertsona pasatzea aurreikusten dute tokiko arduradunek. Erakusketa horretan bertan beste proiektu batzuk ere ezagut daitezke, tartean, Getxo Antzoki berria, Biscaytik Gune Teknologiko berria edo metroaren lurperatzea. Ordutegia ondokoa da: 11:00etatik 14:00ak arte eta 17:00tatik 21:00ak arte. Ondoren Santa Eugenia eraikineko gela batean jarriko dute. Argazkian, ondoko itxura izango du Romo Kultur Etxeak.
Aurreikusita dago lanak 2010eko erdialdean hastea eta zentro berriak 2012ko bigarren seihilekoan ateak zabaltzea herritarrentzat. Artean, Udaletik "ahalegin berezia" egingo dute "inguruko auzotarrei eta eraikin berria erabiliko duten elkarteei lanen gaineko informazioa eskaintzen, aldian aldian". Egungo Santa Eugenia plazako orubean, eskoletako eraikina bota eta gero, altxatuko dutena, "Romo bizkortzeko eta auzoa Areetan integratzeko izango da", udal iturrien hitzetan. 8 miloi euro baino gehiagoko gastua suposatuko du eta, horren bidez, 4.000 metro koadro baino gehiago jarriko dituzte "kulturaren, artearen eta udalerriko elkarteen zerbitzura".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun