Ugeraga Kirol Elkarteko bi taldeak, UCI Lointek eta Hotel Modus Vivendi taldeko neskek osaturikoak, asteartean, abenduak 2a, aurkeztu zituzten Sopelako Kurtzio Kultur Etxean. Ekitaldi jendetsuan kirol arloko, politikako eta kultura esparruko hainbat aurpegi ezagun ikusi ahal izan ziren. Emilio Ramos manager nagusiak adierazi zuenez, bi taldeok oso itxaropentsu aurre egingo diote denboraldi berriari: “dena irabazteko prest gaude, inolako konplexurik gabe, beste taldeetako txirrindulariek ere bi zango dituztelako eta beraiei irabazteko gai garelako, orain arte bezala lana ongi egiten jarraitzen badugu”, nabarmendu zuen. UCI taldean izango dira denboraldi berrian Xary Rodriguez, Leticia Gil, Belen Lopez, Devora Galvez, Judit Masdeu, Patricia Perez, Ane Marie Schmitt, Fany Riberot, Mireia Epelde, Silvia Tirado , Lucia Gonzalez eta Cristina Aznar, eta talde teknikoa osatuko dute Loly Sansanok, Ibon Yurrek eta Iñigo Larekizek. Argazkian, Lointek taldea / © Joseba Zubiaur - Sopelako Udala.
Modus Vivendi Hoteleko txirrindulariak ere aurkeztu zituzten ekitaldi berean. Talde hori da UCIko taldearen benetako haztegia, eta beti izan da “irabazleen eskola”, Imanol Garai Sopelako alkateak gogora ekarri zuen bezala. Udal agintaria “harro” azaldu zen urteetan zehar talde honek egin duen lanaz. Gaineratu zuenez, “Joane Somarriba bezalako kirolari apartak izan dira lan horren guztiaren isla”. Aurkezpen ekitaldia amaitu zenean, bertan izan ziren guztiek mokadu bat hartu ahal izan zuten. Lunchean elkarrizketa atseginean ikusi ahal izan ziren Roberto Laiseka eta David Etxeberria bezalako txirrindulari profesional ohiak eta Margarita Uria diputatua, besteak beste. Azken hori “pozez zoratzen” zegoen, berriro, txirrindularien lasterketa bat taldeko zuzendariaren autotik jarraitzeko aukerarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun