Abenduaren 26an "bat-batean eta arauz kontra" onartutako udal aurrekontuak baztertzea eskatu zuen atzo Koldo Martinez Berangoko Ezker Batuaren zinegotziak. Horretaz gain, parte-hartzean oinarritutako aurrekontuak egiteko batzordea sortzea galdegin zuen EBko ordezkariak, berau "Hirigintzako Aholkularitza Kontseiluarekin koordinazioan arituko dena". Martinezek adierazitakoaren arabera, azaroaren 23ko Ogasun Batzordeko bileran aurkeztu zuen Udalak hilaren 26ko osoko bilkuraren gaien zerrenda: "bi egun beranduago izandako aipatu batzordeko bigarren deialdian, hau da, udal batzarra baino egun bat lehenago, nabarmenki aldatu zuten aurrekontuen zirriborroa", gaineratu duenez. Gauzak horrela, horien onarpena "bertan behera" geratzen dela uste du Ezker Batuak, "gutxienez, Udal Arautegi Organikoaren hiru artikulu urratu dituztelako". "Osoko bilkura deitzeko gutxieneko epeari, gaien zerrendan zer edo zer gehitzeko batzordean kontsultatzeari eta udal batzarrerako dokumentazioa eskura jartzeko gehienezko aldiari dagozkionak", Martinezen arabera. Argazkian, Anabel Landa Berangoko alkatea / © Berango.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun