Adin txikiko bost gazte atxilotu zituen Getxoko Udaltzaingoak Getxon Urte Berri egunean, ostiralean. Getxoko Udalak zabaldutako bertsioaren arabera, atxilotuek eta identifikatutako beste sei gaztek Getxoko ikastetxe batean "indarra erabiliz lapurreta batean parte hartu" ei zuten. Atxiloketa eta identifikazioak urtarrilaren 1eko arratsaldean abiatu ziren, 20:00ak aldera, Udaltzaingoaren Koordinazio Zentroan Getxoko Andra Mari herri ikastetxeko alarma piztu eta horren berri izan zutenean. Ikastetxera hurbildutako udaltzainek gaztetxo talde handi bat ikusi zuten eskola barrutik ihesean, Galearako bidea hartuta. Era berean, atariko ateko kristala apurtuta zegoela nabaritu zuten. Gaztetxoak geroago aurkitu eta haietako bost atxilotu egin zituzten udaltzainek. Bost horiek, beti ere udaltzainen arabera, "ikastetxean ostutako hainbat gauza, disko gogor bat, gitarra bat... zeramatzaten aldean". Adin txikiko guztiak Bilboko bizilagunak dira eta euren gurasoen eskuetan utzi zituzten, eta era berean, gertatutako guztiaren berri eman zioten epaitegiari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun