Getxo Antzokiko lanek bortxaketa eta lapurreta saiakerak areagotu dituztela uste dute auzokideek
Algortako San Nikolas plaza inguruetan "segurtasunik eza" eragin dute Getxo Antzoki berria altxatzeko lanek, bertako auzokideen arabera. Obrak hasi zirenetik, "hainbat eraso eta lapurreta emateaz gain, beste saiakera ugari" izan direla salatu dute. Horiek guztiak jasotzen ari da (antzokisiperoasino[abildua]gmail.com) San Nikolas Auzo Elkarteak, inguruari "segurtasuna itzultzeko ekintzak abiatu aldera". Hala ere, ez dute zehaztu zeintzuk liratekeen horiek. Bitartean, "egoera gordetzea, edo zehatzago esan beharko genuke, gertaeren aurrean ezkutatzea" leporatu diete tokiko agintariei auzotarrek. Aipatu dutenez, orain gutxi ezezagunek emakume gazte bati "lapurtu eta era basatian eraso egin zioten", San Nikolas plazan jarritako pasabideetan barrena zihoala. "Txakurrak lagundutako beste auzokide batek ekidin zuen gaizkileek euren helburua lortzea" gaineratu dutenez. Hala ere, atxilotuak izan ostean, "neskaren harriduraren aurrean, epaitegiak askatu egin zituela" eta "libre eta edozein unetan erasotzeko prest" daudela salatu du San Nikolas Auzo Elkarteak.
Auzotarrek jarraitu dutenez, beste neska batek bortxaketa saiakera jasan zuen. "Erasotzaileei azken orduan aurrea hartu eta lasterka atera zen", gaineratu dutenez. Beste bati lapurreta egin omen zioten. "Kasu guztietan emakume gazteak dira. Edonork imajinatu dezakeen bezala, egun beldurrak jota jarraitzen dute, euren auzotik lasaitasunez ibili ezinik", azaldu du San Nikolas Auzo Elkarteak. Gaineratu dutenez, erasotutako guztiek ez dute salaketa jarri. Bestalde, auto baten lapurretaren berri eman dute: "orain gutxi Volkswagen Golf ibilgailua eraman zuten, Etxeandia Apezpikua kaletik; eta kiskalita agertu zen egun gutxitara. Diotenez, hainbat merkataritza guneetan lapurreta egiteko erabili zuten burua estalitako lau lagunek", azaldu dute bizilagunek. Auzo-elkartearen arabera, ez dute jendea urduritzeko asmorik, "erne ibiltzeko informatu eta, batez ere, Udalak ezkutatzen ari denaz ohartaraztea" baizik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun