Itzubaltzeta / Romo eta Pinuetako kasuan, Getxoko Udalak hainbat txosnari jarritako debekuak eragin zuen jende gutxiago ibiltzea eta jai batzordeak diru sarrera gutxiago izatea. Leioako kasuan, Kobetasonic eta Hatortxurock jaialdien lehia eta Leioako Udalak txosnaguneari festibalei aurre egiteko dirulaguntza berezia kendu izana dira diru galeren arrazoi nagusiak.
Biharkoak ez dira bi herrietan defizita estaltzeko antolatu dituzten lehenengo ekimenak. Besteak beste, Maritxu Teilagorrik hainbat zozketa burutu ditu Udondo, Ondiz eta Txoperako jaietan zein Leioako Nekazaritza Azokan. Itzubaltzeta / Romo eta Pinuetako jai batzordeak berriz, itsulapikoak jarri ditu hainbat tabernetan "Ondo pasa, gutxi gasta ta bueltak... Erromoko jaiei!" lelopean. Era berean, ohiko Gabonetako Loteria kaleratu zuten.
Itzubaltzeta / Romo eta Pinuetako jai batzordeak eta Leioako Maritxu Teilagorri txosna batzordeak jai herrikoien aldeko festa bana antolatu dute astearte eta asteazkena bitarteko gauerako. Ohiko Errege Gaueko kotilioia beharrean, Jai Gaua antolatu dute itzubaltzetarrek. Iluntzeko 21:00etan, Santa Eugenia plazan egingo duten kalejira musikatuarekin ekingo diote festari. Herrian zehar txikiteoan aritu ondoren, 23:00etan jaialdia hasiko da Itzubaltzeta gaztetxean. Bertan, hiru euroko sarreraren truk, herriko DJak, zozketak, Wii kontsolako Sing Star jokoaren lehiaketa... eta sorpresa ugari izango dira, jai batzordeko kideek iragarri dutenez. Leioari dagokionez, Maritxu Teilagorrik jai kubatarra antolatu du Kurkudi herriko tabernan, sarrera doakoa dela. Gaueko 12etatik aurrera, Kubako ohiko musika, oraingo erritmoak eta aurtengo nobedadeak entzuteko eta dantzatzeko parada izango da, mojitoak eta izotz-edariek berotuta. Kasu bietan, eskuratuko duten diruak herriko jaiek izandako diru galerak estaltzen lagunduko dute. Argazkian, 2009ko Itzubaltzeta / Romoko jaietan txosnei babesa emateko hainbat koadrilek egindako agerraldia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun