Getxoko Udalak hainbat urteetan "B eta bereziki D eredua" sustatu izan ditu, Getxoko PPren kritika gogorren artean. Era berean, 2002an Arartekok Getxoko Udala gogor kritikatu zuen kanpaina horretan Iñaki Zarraoa alkateak gurasoei B eta D ereduen aldeko gutuna bidali izana. Orduan Mertxe Agundez zen jarduneko Ararteko, egun Eusko Legebiltzarrean PSE-EEko legebiltzarkidea dena. Gerora, Getxoko Euskara Zerbitzuak kanpaina aldatu eta A, B eta D ereduei buruzko informazioa zabaldu du.
"D bitamina"
Alkarbidek gaur jakinarazi duenez, Bizkaiko 45 udalerri batu dira ekimen honetan eta urtarrilaren erditik aurrera haurrak D ereduan matrikula daitezela sustatzeko informazio-kanpaina abiaraziko dute. Guztira, 7.600 liburuxka banatuko dira kanpainan zehar, 2-3 urteko haurrak dituzten gurasoek matrikulazio-kanpaina hasi aurretik ezagutu ahal dezaten zer den hezkuntzako D eredua eta zein arrazoi dauden euskara hutsean eskaintzen den eredu hori aukeratzeko.
Informazio-kanpainaren leloa “D bitamina. Aberastu bere heziketa!” izango da. Kanpaina horretan, Uribe Kosta eta Erandioko udalez gain, Arrieta, Abanto-Zierbena, Arrigorriaga, Balmaseda, Berriz, Bilbo, Enkarterri, Etxebarri, Fruiz, Gamiz-Fika, Gatika, Gordexola, Laukiz, Maruri-Jatabe, Mungia, Muskiz, Ortuella, Sestao, Txorierri, Urduña, Zaldibar eta Zierbena ere hartuko dute parte.
Alkarbidek koordinatuko du kanpaina, eta helburua da haurrak lehenengoz matrikulatu behar dituzten gurasoei D ereduaren gaineko informazio gehiago eskaintzea, bai eta euskarazko eredu horrek dituen aukeren gainekoa ere.
“D bitamina. Aberastu bere heziketa!” kanpainako informazio-liburuxkarekin batera, udal arduradun batek izenpetutako gutun bana jasoko dute familiek, euskarazko hezkuntza aukeratzeko arrazoiak azaltzeko. Horrekin batera, haurrentzako oparitxo bat ere jasoko dute etxean: altura-neurgailu bat, haien hazkundea eta bilakaera islatuko duena.
Gurasoek bi edo hiru urte bitarteko haurrak D ereduan matrikulatzeko kanpaina egingo dute datorren astetik aurrera eskualdeko ia udal guztiek. Izan ere, Getxoko Udalak izan ezik, Uribe Kostako mankomunitateko udal guztiek (Barrika, Berango, Gorliz, Lemoiz, Plentzia, Sopela eta Urduliz) eta Leioak parte hartuko dute Alkarbidek antolatutako “D bitamina. Aberastu bere heziketa!” leloko informazio kanpainan. Erandioko Udalak ere parte hartuko du ekimen horretan. Lehenengo aldia da Bizkaiko Foru Aldundiak eta Bizkaiko makina bat udalen euskara zerbitzuek osatzen duten Alkarbide erakundeak D ereduaren aldeko kanpaina egiten duenik. Orain arte, azken urteotan, B eta D "euskal ereduen" alde agertu izan da foru erakundea, euskalgintza eta irakaskuntzako hainbat eragilek D ereduaren, "euskalduntzen duen eredu bakarraren", aldeko kanpainak egin dituzten bitartean. Argazkian, 2008ko apirialren 24an Getxoko udaletxearen aurrean euskalgintzak egindako kontzentrazioaren irudi bat. Egun horretan, Getxoko Udalbatzak A, B eta D ereduak udalerriko ikastetxe guztietan ezartzea eskatu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun