Kulturaz blai izango da Itzubaltzeta gaztetxea asteburuan

Itzubaltzeta / Romoko Itzubaltzeta gaztetxeak kultur asteburua antolatu du gaur, bihar eta iganderako. Gaur bertan, ostiralarekin, Urtzi Perez filma laburren gidoilari eta zuzendari autodidaktak "Amada Mantis" bere bigarren lana proiektatuko du, pasa den azaroaren 29an Lutxanan estreinatu zuena. Hitzordua gaueko 22:00etan izango da gaztetxean bertan. Gainera, Itzubaltzeta eta Bilboko Puñalada Trapera musika taldearen azken bideo-klipa, "Prisionero de tus miedos" abestiarena, ere ikusteko aukera izango da. Bestalde bihar, larunbata, Krimen y Kastigo Basauriko punk-rock talde mitikoak kontzertua eskainiko du, Vinagre de Sidra eta Sin Pegas taldeekin batera. Basauritarrek "Jaulas de Cristal" (rar) disko berria aurkeztuko dute. Azken lan hori herenegun jarri zuten jaisteko moduan beraien webgunean eta ezin da inon erosi. Kontzertua arratsaldeko 8etan hasiko da eta sarrera 4 eurotan hartu ahal izango da gaztetxearen atean bertan. Azkenik, igandean zinema sesioa izango da, arratsaldeko 7:00etan. Argazkian, "Amada Mantis" filmaren irudi bat / © Urtzi Perez.