Unai Saiz eta Juan Angel Lamelas leioaztarrak eta Endika Intxausti eta Patxi Bilbao algortarrak sailkatu ziren Euskal Herriko Mus Txapelketaren Leioako kanporaketan. Hamabi bikotek hartu zuten parte larunbatean Ganeko tabernan egindako saioan eta Saizen arabera, "maila altua erakutsi" zuten bertakoek. Dena den, onartu zuenez, "oraindik gogorragoa" izango da Durangon jokatuko den Bizkaiko finaleko lehia. Endika Intxaustiren aburuz, "okerrena da bertan lau erregeetara jolastu beharra, jokoa zeharo aldatzen baita". Intxaustik badu horretan eskarmentua. Izan ere, Euskal Herriko bosgarren gelditu zen aurreko txapelketan. Bizkaiko kanporaketa otsailaren zehar izango da eta txapelketaren finala, berriz, Seguran izango da, martxoaren 20an. Bitartean, baina, eskualdean beste kanporaketa batzuk izango dira. Esate baterako, Berangoko sailkapen partida larunbat honetan izango da, hilak 16, Sei Herri herriko tabernan, arratsaldeko 4:30ean. Bestalde, Sopelan eta Urdulizen ere kanporaketak burutuko dituzte, baina antolatzaileek ez dute zehaztu oraindik bertako proben deialdiak. Argazkian, ezkerretik eskumara jesarrita, Endika Intxausti, Unai Saiz eta Patxi Bilbao. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun