EPPKren oharra:
2010. urteari borrokaldi berrituarekin eman diogu harrera. Agirian adierazi dugun bezala, hilaren 4an hasi eta lehen egunetan espetxetako mugimendu honen arrazoiak plazaratu ditugu han eta hemen, komunikazio astea deitu dugunaren baitan.
Hilaren 11an, EPPK osatzen dugun euskal preso politikook, Espainia eta Frantziako espetxe guztietan itxialdian sartuko garela iragartzea gatoz.
Dagozkigun eskubide sortatik askatasunerako dugun eskubidea nabarmendu nahi dugu orain eta salaketarekin batera erakutsi, gure kidegoaren parte inportante eta zabala modu ezin krudelagoan bahiturik aurkitzen dela, horretarako berariaz asmatutako lege, arau eta trikimailuei esker.
Ondorioz, behin eta berriro gogoratzeagatik ez gara aspertuko:
- Gaixo larri ditugun gure kide guztiak berehala kaleratuak izan daitezen exijitzen dugu. Heriotzaren korridoretik atera ditzatela. Haiei gerta dakiekeen ezein kalte atzeraezinen erantzukizun osoa Gobernu espainolarena izango da.
- Bere unean tribunal arrotzek ezarritako zigorrak aisa beteta dituzten gure kideak berehala kaleratuak izan daitezen exijitzen dugu.
- Baldintzapeko askatasunean kaleratuak izateko bere unean tribunal arrotzek ezarritako zigorraren denbora aisa gaindituta duten gure kideak berehala kaleratuak izan daitezen exijitzen dugu.
Gobernu espainol eta frantsesari dagokie aipatutako norabidean errealitate larri eta onartezin honi irtenbidea ematea. Xantaian oinarritzen den damuketa politiko berrituari fruitu miserableak bilatzen aritu baino.
Euskal Presoak Euskal Herrira! Amnistia osoa!
EPPK
Itxialdia hasi dute EPPKko kide guztiek Frantziako eta Espainiako espetxeetan
Iragarri bezala, Euskal Preso Politikoen Kolektiboak (EPPK) borrokaldiari ekin dio, espetxe politika salatzeko. Atzoz geroztik itxialdian dira kolektiboa osatzen duten 742 kideak, Frantziako eta Espainiako espetxe guztietan; tartean Uribe Kosta eta Erandioko 38 herritar daudela, Etengabe bitakoraren arabera. Bitartean, etxean preso jarraitzen du Anjel Figueroa algortarrak. Protesta gisa, besteak beste, patiora ateratzeari eta telefono deiei uko eginen diotela jakinarazi dute zabaldutako ohar baten bidez. Bestalde, egun 7 euskal preso politikok "gaixotasun larri eta sendaezinekin espetxeraturik" jarraitzen dutela salatu du Etxerat elkarteak. "Beste 6 preso ohi, beraien etxeetan aurkitzen dira preso baldintza zorrotzekin", gaineratu dute euskal preso politikoen senideek. Horien artean ere badago lehen aipatu Anjel Figueroa algortarra. "Espetxe politikak, euskal preso politikoen osasunean esku hartzeko aukerak ezeztatzen ditu", salatu dutenez. Argazkian, presoen alde urtarrilaren 2an Bilbon / Ekinklik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun