Getxolan zerbitzuak estetika laguntzaile ikastaroa antolatu du langabetuentzat
Getxolan Ekonomiaren Sustapenerako eta Enplegu Zerbitzuak "Estetika laguntzailea" izenburuko prestakuntza ikastaroa jarriko du abian, estetika eta zaintza pertsonalaren eremuan trebakuntza edo esperientzia duten edota eremu horretan lan egin nahi duten langabetuei zuzenduta. Tokiko arduradunek jakinarazi dutenez, ikastaroa otsailetik ekainera arte egingo da: 220 orduko trebakuntza teorikoa eta enpresetan lau asteko praktika aldia egingo dira. Era berean, parte hartzen duten pertsonek beka eskuratzeko aukera izango dute, trebakuntza egiten duten bitartean. Estetika laguntzaile ikastaroan izena emateko epea otsailaren 10ra arte egongo da zabalik. Interesatuek informazio gehiago dute eta ikastaroan parte hartzeko izena eman dezakete Getxolanen. Argazkian, Algortako San Martin kaleko 17. zenbakian dauka egoitza Getxolanek.
Ekimena "Getxo Lan In" proiektuaren harira garatzen ari da; Europako Gizarte Funtsak diruz lagundutako eta Espainiako Lurralde Politiken Ministerioak kudeatutako egitasmoa da "Getxo Lan In". Proiektuaren helburua da udalerriko langabetuen laneratzea, arreta berezia emanaz lana eskuratzeko zailtasunak dituzten pertsonei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun