Kale, plaza eta parkeak garbi eta txakurren kakarik gabe mantentzea beharrezkoa dela ohartarazteko kanpaina sustatzea eskatu dio Erandioko Udalari PSE-EEk. Horrekin batera, udalerriko parke eta haurrentzako jolasguneak "gazte askoren gaueko topaleku" bilakatu direla aipatu du Juan Otermin tokiko sozialisten bozeramaileak: "janari hondakinak, latak, botilak, plastikozko poltsak... uzten dituzte bertan, eta garbitzeaz inor arduratzen ez denez, zabor guzti horren artean jolastu behar izaten dute neska-mutilek", gaineratu duenez. Gauzak horrela, garbitzaile-brigadak indartzea, gehiegikeria horiek arretaz jarraitzea eta "auzo guztietan" txikientzako jolasgune gehiago jartzea eskatu du Erandioko PSE-EEk; "ez bakarrik biztanle gehiago duten inguruetan". Txakurren jabeei dagokienez, araudia betetzen duten ala ez begiratu eta, horrela ez bada, "dagokien zigorra" ezartzea galdegin du Oterminek. Argazkian, besteak beste, Getxon horrela ohartarazi zuen txakurren gorotzak jasotzearen beharraz 2007ko maiatzean Udalak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun